Nanoq ikerasaliakkoortoq
Taamatut iliortut sooruna tassaapput Greenpeacermiut, Issittormiut Siunnersuisooqatigiivisa Sverigep avannaani Kirunami pingasunngorpat ataatsimeersuarnissaat sioqqullugu, nunanut allanut ministerimik sunniiniarsarisut.
Issittormiut nunanut allanut ministeriisa Kirunami pingasunngorpat ataatsimiilerpata Issittormiut Siunnersuisooqatigiivi inatsisitigut pituttuisumik aappassaanik isumaqatigiissuteqartussaapput. Isumaqatigiissutaasut siullersaat tassaavoq annaassiniarnermi upalungaarsimaniarnermut isumaqatigiissut, Nuummi ukit marluk matuma siorna atsioqatigiissutigineqartoq. Isumaqatigiissummi nutaami, uuliamik ajutoornersuaqartillugu nunat qanoq iliussanersut pineqarpoq. Greenpeacelli isumaqatigiissut atorsinnaanngitsutut nalilereersimavaa.
- Isumaqatigiissut Issittumi avatangiisinut tunngatillugu atorneqarsinnaanngilaq. Taamatut isumaqarpugut, nunat ilaasortaasut upalungaarsimarniarnikkut piumasaqaateqarfigineqanngimmata, taamaammat aamma isumaqarpugut akisussaassuseqanngitsumik isumaqatigiissutaasoq, Villy Søvndalillu itigartittariaqaraa.
- Isumaqatigiissut ima kimikitsigaaq, allaat atorsinnaanngilluinnartut taaneqarsinnaalluni, taamaammat aamma akisussaassuseqanngitsumik uuliasiorluni qillernerit akuerineqarnissaannut isumaqatigiissut taannarpiaq tunngavilersuutigissagaanni eqqortuussanngilaq. Isumaqatigiissut atorneqarsinnaanngippat aamma tapersersortariaqanngilaq, Greenpeacemeersoq KNR-imut oqarpoq.
Greenpeacermiut filmimik usb-stikkimut immiussamik nunanut allanut ministerimut Villy Søvndalimut pajuttut ministeriaqarfimmut iseqqusaasimanngillat. Taamaattorli Naalagaaffeqatigiit issittoq pillugu aallartitaat Klavs Holm anillappoq Greenpeacermiullu oqaloqatigalugit. Danmarkip, Kalaallit Nunaata Savalimmiullu isumaqatigiissummik pitsaanerusumik kissaateqaraluartut, Greenpeacep uuliakoorneq pillugu isumaqatigiissutip atorsinnaannginneranik isumaqarnera isumaqatiginngilaa.
- Taamatut isigineqarnera eqqunngilluinnaruusoraara. Greenpeacep apeqqummik qaqitsinera iluarisimaarpara, tamakkumi oqallisigineqarnissaat pitsaasuuvoq. Alloriannginnissaq alloriarnissamit pitsaanerusutut oqaatigissallugu kukkunerulluinnarpoq. Anguniakkamut qanillattorneq iluaqutissartaqartuaannarpoq. Inissisimaffigisamiinnarneq ajunnginnerunngilaq, Klavs A. Holm oqarpoq.
Greenpeace NGO-t Issittormiut Siunnersuisooqatigiivini alaatsinaattutut inissikkusuttut ilagaat, Klavs A. Holm naapertussagaanni, nunat allallit - kunngeqarfipput ilanngullugu - akerliutillugit taamatut pisoqarnavianngilaq.
