Nanoq Igalikup eqqaani takuneqartoq

Naalakkersuisoqarfik nanoqarneranik mianersoqqusivoq, inuillu susassaqanngitsut nannumut qanillinnginnissaannik qinnuiginnilluni, politiit tusagassiuutinut nalunaarutaanni allaqqavoq.

- Inuit susassaqanngitsut nannumut qanillinnginnissaannik qinnuigineqarput, naalakkersuisoqarfik allappoq.

Nunattalu kitaani nannut eqqissisimatitaagallartut, Kujataanilu nannuttassiissutit tamakkereertut naalakkersuisoqarfiup aamma eqqaasitsissutigaa.

AAMMA ATUARUK Nanoq Qeqertarsuatsiaat eqqaanni takuneqaqqippoq

Nannumik takunnikkaanni aalisarnermut piniarnermullu naalakkersuisoqarfimmi pigaartup oqarasuaataanut, tassalu  48 25 20-mut, imaluunniit politiit oqarasuaataannut, tassalu 70 14 48-mut sianernissaq kaammattuutigineqarpoq.

Nannut ajornartorsiortitsisut eqqaaniinnermi najoqqutassat tusagassiuutinut nalunaarummi innersuussutigineqarput. Tassani erseqqissaatigineqarpoq, aalisarnermut piniarnermullu naalakkersuisoqarfiup akuerippagu nanoq aatsaat toqunneqarsinnaasoq.

- Allamik periarfissaqanngiivippat nanoq aatsaat toqunneqassaaq, tamannalu pisariaqarnersoq naalakkersuisoqarfiup suliamit suliamut nalilersortarpaa, tusagassiuutinut nalunaarummi allaqqavoq.