Nanoq allarsuusimagaluarpoq

Nanoq ullumikkut ilisimaarisatsitut qaqortunngunngikkallarami kajortuusimagaluarpoq. Tamanna nannup kigutaata ujaranngorsimasup ukiunik 150.000-inik pisoqaassusillip ilisimatusarfigineratigut paasineqarpoq.
Allattoq Elisa Isaksen
marsip 02-at 2010 05:29

- Misissuinitta inernerisa ersersippaat, nanoq ineriartornikkut isigalugu allarsuarmit kingusinnerusukkut inerortorsimasoq, taama oqarpoq Charlotte Lindqvist, USA-mi Buffalomi universitetimi ilinniartitsisuusoq, siusinnerusukkullu Oslomi Naturhistorisk Museumimi sulisuusimasoq.

Nannup tuloriaata ujaranngorsimasup DNA-mik misissuiffigineratigut, allarsuup nannullu ineriartornerminni qanga immikkooruteqalersimanerat, ilisimatusartut akissutissarsisinnaavaat.

- Nanoq ukiut 150.000-it matuma siornagut ineriartornermini allarsuujunnaarluni nanunngorpoq, sermersuaqarneralu akulleq sioqqullugu issittumi sikumi uumasinnaanissamut sukkasuumik naleqqussarluni, Charlotte Lindqvist nutaarsiassaqartitsivimmut Ritzauimut taama oqarpoq.

Taanna atuagassiami Proceedings af the National Acedemy of Sciencesimi allaaserisamut sapaatip akunnerani matumani saqqummersussamut allaaserinnittuni pingaarnersaavoq.

Nannup kigutaa ujaranngorsimasoq 2004-mi Svalbardimi Islandimiumit ujarassiuumit Olafur Ingólfssonimit nassaarineqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq