ASSIT Nanook Japanimut angalasoq
Christian aamma Frederik Elsner maannakkorpiaq Japanimi, guitarilerlutik Tokyomi illoqarfinnilu allani tusarnaartitsisaqattaarput.
- Angalanerput pikkunaqaaq pisassaqangaatsiarlutalu, isumagineqarluarpugulli tusarnaartitsiartorfitsinnilu tigulluarneqartarnerput misigisaqarluarfiuvoq. Maannamut raadiokkooreerpugut tassanilu nipilersuutigut, nunarput pillugu apersorneqareerpugut 'Ai Ai'-ilu toqqaannartumik appisimaarlutigu, Christian aamma Frederik Elsner KNR-imut allapput.
Pisassaqangaatsiaraluarlutilli nuannisarsarnissaminnut piffissaqarlutik, qatanngutigiit nipilersortartut allapput.
- Tokyo illoqarfiuvoq immikkuullarissoq sorpassuaqarfiusorlu. Ippassaq atisarsinnialaarpugut, nerisassaatigissorujussuuppullu barcecueninngaanniit sushinut mamarnerpaanut pigaat.
- Tokyo nipilersornermi qitiusutut Europamilu USA-milu nipilersortartunit isigineqarpoq taamaammat maannga nipilersoriarsinnaanerput nuannaarutigaarput.
Kalaallit piorsarsimassusaat soqutigineqartoq
Sapaatip akunnerani matumani qatanngutigiit Elsnerikkut ullut marluk tusagassiorfinniissapput, tassa TV-ikkut raadiokkut aviisikkullu apersorneqassapput.
- Japanimiut oqaatsigut piorsarimassuserpullu alapernaaffigaat, taamaammat nunarput eqqartugaanngaatsiarpoq, Elsnerikkut oqaluttuarput.
Nanook februaarimi Japaniliaqqissapput tamatumuunakullu nipilersoqatigiit tamarmik ilaassallutik.
- Februaarernissaanut qilanaaqaagut, nipilersoqatigullu appisimaarsuaassaagut, angalanissatsinnilu nipilersortartut allat R.E.M-ikkunneersut Tokyomi Kyotomilu angalaqatigissavagut, qatanngutigiit KNR-imut allapput.
