Nannut silasiorfimmik soqutiginnittut
Thomas Nedergaard aamma Michael Heeris tamarmik teknikeriusut Kap Morris Jesup-imi silasiorfimmik nutaamik ikkussuiartortillutik nannunit akuleruffigineqarput. Thomasip ima oqaluttuaraa:
- Silatitsinni pisorpalaamit unnuami itertinneqarpunga anorillu pisorpalutsitsinerinngikkaa paasillugu. Taava illuaqqap siniffigisartakkatta igalaavaraatigut silammut itsuarama takulerpakka nanoq arnaviaq marlunnik piaralik meterit marlussuinnaat ungasitsigisumiittoq. Qimaasaarutissarput assiliivillu tiguavut nannullu silasiorfeeqqamik assut soqutiginnittut assilisaqattaarlutigit.
Aqaguani nillertukasiulluni anorlerpoq erseqqarippallaarnanilu. Ualiartulersoq kuummi ujarak assakarneqartoq tusaasinnaavara, putsumiillu ersileriallarami nanoq tungitsinnukarusaartoruna. Kinguninngua allat marluk erserput.
Soqutigigaluaqaluta meterit 30 40-llu akornanni ungasitsigalutik qaangiinnarmatigut ullup qeqqasiorniarnerput kinguartikkallaannarparput, Thomas Nedergaard DMI-meersoq oqaluttuarpoq.
Teknikerit silasiorfimmik ikkussuereerlutik maanna Danmarkimut ajoratik angerlareerput. Nannulli silasiorfimmik suli taama soqutiginnitsiginersut soorunami maanna paasisaqarfigisinnaanngilarput.
