Nannut qaninngoortut suli takussaassapput
- Immap sikuata annikilliartornera pissutigalugu nannut inoqarfinnut qanillattortut amerliartorput, amerliartuinnarnissasalu iliminataa annertusoq Peter Løvstrøm Aalisarnermut Piniarnermut Nunalerinermullu Naalakkersuisioqarfimmi fuldmægtig oqarpoq.
Nanoq piararlu Kangaatsiap illoqarfianut qaninngoortut, aallaamik eqqarluni qimaatinniarneqaraluarput iluatsinngimmallu ippassaq toquinnarneqartariaqarlutik.
Taamaallilluni nunatsinni nannut inoqarfinnut qaninngoortut arfinillit piaqqallu pingasut ukiormanna toqunneqarput.
Nunani allani nanoqarfiusuni aamma taamaappoq. Canada-mi illoqarfik Churchill nannut ukiariartornerani ingerlaarnermini aqqusaartarpaat. Nannut Churchill-imut qanillattortut pullatinut isertinneqartarput imarlu sikugaangat sikumukaanneqartarlutik.
Nunatsinni nannut inoqarfinnut qaninngoortut qanoq iliuuseqarfigineqarsinnaanerat killeqarpoq. Namminersorlutik Oqartussat nannunik siumuinermi malittarissassiaanni ilaatigut allassimavoq nannut siumorneqartut aallaammik eqqarlluni qimaatinniarneqassasut. Qimaatinniarneqartarnerili iluatsinneq ajorput.
Nunat nanoqarfiusut suleqatigiissitaani Kalaallit Nunaat ilaasortaavoq. Suleqatigiiffik taaguuteqarpoq Polar Bear Range States, tassani ilaasortaapput, USA, Canada, Rusland, Norge aamma Kalaallit Nunaat.
Suleqatigiissitami tassani nannut nalunaarsorneqarput. Suleqatigiissitaq ukiut tamaasa ataatsimiittartoq, februarip qaammataani Canada-mi Churchill-imi ataatsimiippoq. Suleqatigiissitaq Norge-mi tulliani ataatsimiissaaq.
Nannut toqunneqartariaqarsimasut amerlassusaasa takutippaat periuutsigut suli pitsaanerusinnaasut Aalisarnermut Piniarnermullu naalakkersuisoqarfimmi fuldmægtig Peter Løvstrøm oqarpoq.
Taamaattumik nannut pillugit nalunaarsuiffik nunat nannut pillugit suleqatigiiffianni ingerlanneqartoq atorluarsinnaajumaarlugu neriuutigineqartoq Peter Løvstrøm oqarpoq. Tassani periaatsit suut, nannunik toqutsisariaqalernermik kinguneqartarsimannginnersut takuneqarsinnaalissaaq.
Nannut inoqarfinnut qaninngoortut ukiormanna toqunneqartut Qeqertarsuarmi, Aasianni Nanortalimmi Nuummilu toqunneqarput, Tasiilami pingasut Kangaatsiamilu nanoq piaaralu ippassaq toqunneqarput.
