Nannut pualasuunut iluaqutaasinnaapput
Nannut orsulerujussuarnik nerisarnissaminnut sukkasuumik naleqqussarsimasut, Københavnip Universitetianeersut ilisimatuut misissuereerlutik allapput.
Ilisimatuutut misissuisut taakku isumaqarput, paasisatik nutaat pualavallaalertarneq pillugu ilisimatusarnermut iluaqutaasinnaajumaartut.
Ilisimatuutut misissuisut allarsuup aamma nannup assigiinngissutaat misissuiffigaat. Taakkua ilaatigut tupaallaatigisaminnik paasivaat, ukiut 500.000-it inorlugit matuma siornagut nannut taakku uumasoqatigiinnut assigiinngitsunut marlunnut avissaarsimasut. Kingornunneqartartunillu ilisimatusarnermi paasineqarluni nannut issittumi avatangiisit sakkortuut saperunnaariartorsimagaat.
Professor Rasmus Nielsen misissuinermi suleqataasoq, atuagassiamut ilisimatusarnermik sammisaqartumut Cell-imut ima oqarpoq:
- Piffissap taama sivisunngitsigisup ingerlanerani immikkuulersimanerat tupaallannartuuvoq. Tamannami oqallisigineqartaqaaq. Nannup issittumi avatangiisinut asseqanngitsumik naleqqussarsimanera, piffissaq sivisooq atornagu pisimassaaq, taanna oqarpoq.
Nannup qaqortunngornermi salunnerulernermilu saniatigut timaata inuussutissanik suliarinnittarnera allanngorpoq timimigullu naleqqussarluni. Timaata orsumik suliarinnittarnera uummataatalu taqai orsoqarluartunik nerisaqarnissamut naleqqussarsimapput. Paasisallu nutaat tamakku, pualavallaalertarnermut misissuinermi iluaqutigineqarsinnaassasut ilisimatuut oqaatigaat.
Silap piffissami sivisuumi kiannerata kinguneranik nannut allannguuteqarsimanissaat ilimatsaanneqarpoq. Avatangiisit allanngornerisigut allarsuit avannarpartersimasinnaapput. Sermersuaqarneralu nutaaq atuutilermat allarsuit nikeriarsinnaajunnaarnermikkut sukkasuumik allannguutearsimanissaat ilisimatuut eqqoriarpaat.
