Nannut pingajoqqat Napasummi naamasaqarlutik qaninngoortut: Nakkutigineqarlutik qimaatinniarsarineqarput

- Ippassarli qimaateqattaaramikkit, kisianni uteqattaartuarput. Nerisassat naamasatik uteqattaartuarfigigamikkit.

Aqqaluartaannguaq Platou Napasummioq taama oqarpoq.

Taassuma nannut pingajoqqat arfininngormalli takuneqaqqaarmatalli malinnaafigai.

Nannut ataasinngornermi ullup qeqqa qangilaaraa Napasup kujatinnguaniittut Aqqaluartaannguaq Platou oqarpoq. Qimaasaarneqaraluarlutik kimmukartinneqartaraluarput nunaqarfimmili naammasaqarlutik uteqattaarput.

- Napasup eqqaani nannunik aatsaavissuaq takuvunga. Immaqa Napasummi oqaluttuarisaanermi aappassaani imaluunnit siulliupajaarunaraluarpoq. Siuligut Napasup eqqaani nannuttarsimasut tusareerpargut, Aqqaluartaannguaq Platou oqarpoq. 

- Kaassimagamik uteqattaartuarput, aamma ullaaq napasup eqqannguanni qeqquartorsimapput sissa tineriarmat.

Napasummi piniartut nannut pingajoqqat maassakkut nakkutigivaat. Piniartut umiatsiaaqqatik atorlugu nannut sapaatiummat qimaasaaqattaarsimavaat, sulili nannut uteqattaarput. 

Piniartoq Nukappiannguaq Platou tassani aamma peqataavoq. Nannut pingajoqqat Napasup kujataatunginnguani kilometerit ataaseq missaani qanitsigisumiittut, Nukappiannguaq Platoup nalilerpaa.

- Kaappasigunaramik qimagukkusunngillat, puisikut immaqalu saarulliit kussartitat taavalu tikaagulliit panertuliat naamasimassagamikkit, Nukappiannguaq Platou.

- Assut alutornarput, takkuteqqaarmata Napasumi sumi tamaani nanoqarneranik nilliarpaloqattaarput.

Taanna nannumik piniarnermik allagartamik qinnuteqarsimalluni pissangavoq,

- Akuerineqassappat toqunneqassasut qinnuteqarnikuuvunga toqutsisunut ilaaniarsarisussaavunga perngarniassagama.

- Assut pissanganarpoq, takoqqaaratsigit paatsiveerusimaarnermik aatsaat takugama Kalaallit Nunaanni. Pingajoraasut takugatsigit pisariinngiinnarpagut.

Maanna Nukappiannguaq Platou nunaqqatinilu utaqqiinnarput. Nannulli nunaqarfimmi naammasatik nerisassat unnulerpat aatsaat alakkartussaagaat, taakku ilimagaat.

- Nannut uninngaannaramik, immaqa taarsippat maannga qanilliniaramik. Arlaatigut pisoqaraangat immitsinnut sianerfigeqattaattarpugut.