Nannut piaraat naalliupput
Silap pissusaata allanngornerani silap kissatsinnera nannut piaqqat arlallit toqunerannik kinguneqarsimasoq, uumassusilerituut aarlerisaaripput. Silap kissannerata siku allanngorarnerulersippaa, nannullu sikumiissinnaajunnaarlutik takineruleraluttuinnartunut naluttariaqartalerput.
Nannut inersimasut GPS-ilerlugit ilisimatuut malinnaaffigisimavaat, paasivaallu nannut inersimasut 48 kilometerisut, takinermilluunniit nunamut sikumulluunniit pinngiivillutik naluttarunik piaraat toqusartut 48 procentimik amerlanerulersartut. Piaqqat allat taama nalutsigineq ajortut 18 procentii toqusarput.
Immap sikuata sukkasuumik aakkiartornerata nannut takinermik naluttalersippaat, ilisimatuut erseqqissaapput.
- Silap pissusaata allanngoriartornerata siku nannut inuuffigisaat nunguutilerpaa, nerisassarsiornerminnilu inuuffissarsiornerminnilu takinerusumik naluttariaqalerput, Geoff York, misissuinermi peqataasimasoq, atuagassiamut Live Sciencemut oqarpoq.
Ilisimatuut nannut inersimasut 68-it GPS-ikkut Ualerngup Tarajuata kujataani Chukchimilu ukiut tallimat ingerlaneranni malinnaavigisimavaat, Live Science allappoq.
Nannut piaraat pillugit nalunaarusiaq marlunngormat nunat tamalaat akornanni nannunik soqutigisallit, IBA-p, katersuunneranni Ottawami pisumi saqqummiunneqarpoq.
