Nannut nungutaanissaannut ulorianartorsiunnginnerat uppernarsarniarneqarpoq
Nunat tamat peqataaffigisaannik marsip qaammataani ataatsimeersuartoqarnerani, uumasut nungutaanissamut ulorianartorsiortut ulorianartorsiunngitsullu nalunaarsorneqartussat pillugit USA sinnersuuteqarluni saqqummiussiniarpoq, Canadami ilanngutassiortorput Marianne Stenbæk nalunaarpoq. Nannut nungutaanissaminnut ulorianartorsiortinneqanngillat, taamatut isumaqarput naggueqatigut akilinermiut Nunavummiut. Taakkua isumaqarput silap pissusaata allanngoriartorneratigut nannut nerisassaminnik pissarsiniartarnerat ilaatigut ajornannginerusartoq. Suliniaqatigiiffimmi Nunavut Tunngavimmi nannut pillugit suliniuteqartoqalerpoq.
Oqarasuaat Nunavummi piniartut tamarmik sianerfigisinnaasaat pilersinneqarpoq, tassuuna piniartut nannut pillugit oqaluttuaat isumaallu oqaluttuarisinnaallutik, katersorneqarlutillu.
Canadami nannut 22.000-it 25.000-illu akornannik amerlassuseqarput.
Piniartut ilisimasaannik katersuinermik suliniummik aqutsisoq, Paul Ingaut oqaluttuarpoq, piniartut ilisimasaasa katersorneqarnissaat pingaaruteqartoq, nannut nungutaanissaminnut ulorianartorsiortinneqannginnerat, ilisimatuunut Canadap kujasinnerusortaaniittunut qulakkeerlugit
uppernarsarneqassammat.
Nannut pillugit ilisimasanik katersat, marsip qaammaataani ataatsimiinnermi saqqummiunneqassapput.
Nannut nungutaanissaminnut ulorianartorsiortitaannginnerisa uppernarsarneqarnissaat Nunavummiunut pingaaruteqarpoq, qangaaniilli piniarneqartarnerat pingaartineqarluni aammali nannut piniarneqartarnerannut ukiumut isertitsissutaasartut 15 millione koruuniusut iluaqutigineqarnerat pingaartinneqarluni
Canadap kujasinnerusortaani najugaqartut akiliillutik nannunniartitsisarnerannit Nunavummi inuit aningaasatigut isertitsissuteqartarput. Oqarasuaatikkut saaffiginnilluni nannut pillugit paasissutissatik katersuiffik, qaammat ataaseq qaanngiummat ammarneqarpoq, maannamullu Nunavummi piniartut 30-it nannut pillugit ilisimasatik isummatillu pillugit saaffiginissimasut Canadami ilanngutassiortoq Marianne Stenbæk nalunaarpoq. Canadami nannut pillugit ilisimasanik isummanillu oqarasuaatikkut saaffiginnittarfik normoqarpoq 001-877-975-4901.
