Nannut nerukkarnissaat inerteqqutaavoq
Nannut marluk Qeqertasuatsiaat eqqaanni ungoorneqannginnerminni nerlersorneqareersullu mianersoqqussut takkuppoq.
Tamatumami malitsigisinnaavaa sumiiffiit inoqarfiusut inuillumi nannunit neriniarfittut isigineqalersinnaaneri, taamaattumillu inoqarfinnut ornigutikulalernerusinnaallutik. Nannummi, piaqqalluunniit inunnut navianartorsiortitsisinnaapput, Namminersorlutik Oqartussat nalunaarput.
Nannumik siumuigaanni qanoq iliortoqassava?
- Uumasut pisuinnarmik immakkulluunniit angallammik qaninngoorneqassanngillat, qimanneqassallutillu
- Pisariaqarpat, uumasut qunusaarlugit aallaammik kalerrisaarummilluunniit eqqarasuartoqassaaq, kalerrisaarummik assigisaanilluunniit nilliasaammik ungoorneqassallutik
- Politiit najukkanniluunniit piniarnermi nakkutilliisoq nalunaarfigissavat sumi nannumik takusimallutit
Allamik periarfissaqanngikkaanni nanoq toqunneqartariaqalersinnaavoq. Aallaat minnerpaamik kaliber 30-06 nerumitsumik aqerlortalik tamatumani atorneqassalluni.
Imminut illersorniarluni nannut aallaaneqarsimasut qanoq pineqartarpat?
Imminut illersorniarluni nannumik aallaannittariaqarsimagaanni, uumasoq pisarisaq pigilerneqarneq ajorpoq. Amia, kukii niaqualu Namminersorlutik Oqartussanit arsaarinnissutigineqartarput. Neqaa trikineqarneranik misissorneqareertillugu, kommuunimi utoqqarnik meeqqanillu paaqqinnittarfinnut agguaanneqartarpoq.
Imminut illersorniarluni nannumik aallaannittariaqarsimanerit tamarmik politiinit misissugarineqartarput. Paasineqarpallu pisoq navianartorsiorfiusimanngitsoq taamaattumillu imminut illersorniarluni aallaanninnerusimanngitsoq, aallaannittuusoq akiligassinneqassaaq, Namminersorlutik Oqartussat taama nalunaaruteqarput.