Nannunniarneq unippoq
Nunarterneqarpoq 16.4. nal. 10.30.
Kujammut Nuup Kommunerisimasaanit avannamut Uummannap Kommunerisimasaanut nannuttassat ukiumut qulingiluaasut ukioq imaaliinnartoq nungoreerput, allaammi pingasunik Qeqertarsuarmi atatsikkungajak pisarineqartunik sipporneqarlutik. Taamaammat nannunniarneq ingerlaannartumik unitsinneqartoq, Piniarnermut Naalakkersuisoqarfik taama nalunaarpoq.
Qeqertarsuarmi nannut marluk marlunngormat ataaserlu pingasunngormat pisarineqarput. Unioqqutitsilluni pisat aamma aappaagumut pisassanit ilanngaatigineqassasut, Naalakkersuisoqarfiup ilanngullugu ilisimatitsissutigaa. Oqaatigisinnaanngilaalli Qeqertarsuarmi nannut pingasut qanittukkut pisarineqartut aamma unioqqutitsinikkut pisatut isigineqassanersut, suli nalilersuisoqarmat.
Upernavimmi piniartut suli nannuttassaqarput, pisassiissutinit 43-sunit arfineq-marlunnik suli nannuttassaqarluni.
Upernaviup eqqaani Aappilattumi ippassaani nannuttoqartoq, Nikolaj Jensen Qaasuitsup Kommunianit nalunaarpoq.
Piniarfimmi Avanersuarmi Kane Bassin-imik taagukkami suli pisassat arlaliupput. Siorapaluk, Moriusaq, Qeqertat aamma Qaanaaq katillugit arfinilinnik maanna pisassaqarput, ataasiinnaq maannamut pisarineqarsimammat.
Savissivimmi 18-inik pisassalimmi maannamut pingasunik pisaqartoqarpoq. Tunumilu Illoqqortoormiuni pisassat 30-it akornanni aqqanillit nannuttarineqareerput, Tasiilami pisassat 20-it akornanni aqqanillit aamma pisarineqartut.
Pisarineqartulli maanna nalunaarutigineqartunit amerlanerusinnaapput. Qasserpiaat pisarineqarsimanersut pillugit inuussutissarsiornermut siunnersortit Piniarnermut Naalakkersuisoqarfimmit ulluni makkunani saaffigiortorneqaleruttorput.
