Nannumik saassutsikkaluartoq annappoq
- Nanumik paannilluni nuanningivippoq, taama itsarnisarsiooq Jens Fog Jensen oqarpoq.
Jens Fog Jensen ilisimatuussutsikkut misissuinermi "Kampen om Klimaet"-imi Nationalmuseummimiit ingerlanneqartumi aqutsisuuvoq.
GPS-ini suleqatiminut tunniuteqqammeraalu nanoq nuivoq, 10-15 meterisut ungasitsigaluni saassussilerlunilu.
- Pisoq sukkangaarmat eqqarsariarpallaanngilanga. Tunginnullu aallarmat eqqarsaatigaara niaquatigut tukerniarlugu, Jens Fog Jensen oqaluttuarpoq.
Nanoq marluinnarnik ukioqaraluartoq nukissui maluginianngitsuugassaasimanngillat:
- Uanniit nukittunerujussuuvoq. Anginerusimasuugaluarpammi qularnanngilluinnarpoq toqutaasimassagaluartunga, Jens Fog Jensen oqarpoq.
Taassuma saassunneqarnermini toqu eqqarsaatigissalluguluunniit piffissaqanngilaq.
- Toqumilluunniit eqqarsarianngilanga, pisullu kinguninngua aallaamangaarama aatsaat maannakkut susoqarsimanersoq iluamik eqqarsaatigisinnaalerpara. Maannakkullu ilimagisanniit ajunnginneroqaanga,
Jens Fog Jensen oqarpoq.
Nannup saassussinermini itsarnisarsiooq niuisigut taliisigullu kimmarpaa.
- Nannup talikkut niukkullu kimmarpaanga, aamma uppatikkut kiivaanga, 5 koruunitut angitigisumik ilanngarlunga, Jens Fog Jensen oqaluttuarpoq.
Suleqataata Bjarne Grønnovip aallaat nassatartik tigoriarlugu nanoq niaquatigut aallaavaa, nanorlu Jens Fog Jensenip niuanut paluvoq.
- Saassutarileruttoraanga suleqatiga Bjarne Grønnov nanoq aallaaniarlugu piareersarpoq.
Taannalu nilliaffigaara 'massakkorluinnaq aallaaqiuk!' niaquatigullu aallaavaa, nanorlu niunnut paluvoq, Jens Fog Jensen oqarpoq.
Toqulluarniassammallu Jens Fog Jensenip suleqataata naggammik qungasiatigut nangillugu aallaavaa.
- Nanoq toquniariartoq ajoqusernikka mattusipallappagut satellittikkullu oqarasuaammik Marine Basisimut sianerluta, Jens Fog Jensen oqaluttuarpoq.
Jens Fog Jensen maannakkut Københavnimi angerlarsimaffimminiittoq tupassimagaluaqaluni suliffimminut atatillugu Nunatsinnut uteqqinnissani neriuutigaa, tamatumuunalugooq nannunik qinernerusarniarpoq.
