Nanisivimmi talittarfiliornissaq kinguaattoorpoq
Nanisivimmi Nunavummiittumi talittarfiliortoqarnissaa Canadap ministeriunerata, Harperip 2007-mi neriorsuutigaa.
Talittarfik Canadap sakkutuuinut imarsiortunut angerlarsimaffittut atorneqartussaavoq. Tassunga atatillugu Canadap illersorneqarnissaanut pingarutilimmik inissisimassaaq, tassami sakkutuut imarsiortut Sullualuup Issittullu illersorneqarnissaannut aallaavittut atortussaammassuk, ajutoortoqartillugulu umiarsuit tassanngaanniit annassiniarsinnaaniassammata. Umiarsualivik aamma Canadamiut umiarsuaataannut issittup kangiatungaani ingerlaartunut pilersuivittut atorneqassaaq.
Nanisivimmi talittarfiliorneq ukiup tulliani naammassineqartussaagaluarpoq, kisiannili sanaartorneq suli aallartinngilaq aasarlu manna aamma aallartinniaviarnani.
Pissutaasut marluupput. Siulleq avatangiisinut tunngasunut misissuinerit suli naammassineqarsimanngillat. Tamakku naatsorsuutigisimamiit sivisunerusumik ingalanneqarsimapput, Nanisiviummi eqqaa aqerlumik zinkimillu piaaffiunikuuvoq avatangiisitigullu ajornartorsiutaasinnaasut paasiniaqqaagassaapput.
Pissutaasup aappa tassaavoq aningaasat. Sanaartugarsuit allat assigalugit talittarfiliassaq naatsorsuutigineqartumiit akisunerujussuussaaq.
Canadap illersornissamut ministereqarfiata oqaaseqartartuata aviisimut Daily Commercial Newsimut oqaatigaa, issittumi talittarfiliortoqarnissaanut atatillugu unammilligassarpassuit illersornissamut ministeriaqarfimmiit maanna ilisimaneqarnerulersut. llanngullugulu oqaatigaa sanartorneq 2013-mi aallartinneqassasoq, 2016-imilu pilersaarutaareersutut ukiunik pingasunik kinguaattoorluni naammassineqarnissa naatsorsuutigineqarpoq.
