Naneruuteeqqat tamakku sanaartorneqarsimasut pingajorarterutaat ikuallatsitsilersinnaapput imaluunniit qupinnguallatsitsillutik. EU-Kommissionip misissuisitsinerani tamanna erserpoq. Pingaartumik innaallagissap aqqutaanut ikkuttakkat, kiggequtit liininngillu qupinnguallannarsinnaapput. Danmarkip Radioata nittartagaani tamanna atuarneqarsinnaavoq.
Tysklandimi, Hollandimi, Slovakiami, Sloveniami Ungarnimilu misissuisoqarmat paasineqarpoq, naneruuteeqqat misissukkat 30,4 procentii sakkortuumik ulorianaateqarsinnaasut.
EU-mi atuisartunut kommissærip, Meglena Kuneva-p, qularutiginngilaa, misissuinerup inerneri nunanut EU-mut ilaasortaasunut siaruarterneqarsinnaasut, naneruuteeqqaammi innaallagiartortut naneruuserfiliortartunit aalajangersimasunit sanaartorneqarnerusarmata.
Orpilissat naneruuteerassaannik pisiniarniarutta, pisiniarfinnut tatigisatsinnut, isumannaallisaanermillu ilisimasaqarluartunut, pisiniartarnissarput EU-Kommissionip kaammattuutigaa - naneruuteeqqallu nakkutigineqartinnatik ikumatiinnarneqartassanngitsut aamma kaammattuutaavoq.