Namminersornissaq qularnarunnaarpoq
Kalaallit ilaasortaatitaat marluk, politikkikkut kinguaariit nikinnerinik takussutissiisut taaseqataapput, Lars-Emil Johansen, ukiuni 40-ni Kalaallit Nunaata namminersornissaanik sorsuuteqartoq, kiisalu 25-nik ukiulik Juliane Henningsen, aappassaanik qineqqusaaleruttortoq.
Folketingimi ilaasortaatitat marluk oqaluttuarisaanermi ullormi pingaaruteqartumi ima oqarput:
Juliane Henningsen, IA:
- Isumaqarpunga kinguaariit politikerit sorsussimanerannut, ilungersorsimanerannut suleqatigiissimanerannullu qujassutissaqassalluta pissutissarpassuaqartugut
- Aamma isumaqarpunga inuusuttut ilaatigut kiffaanngissuseq maannalu namminersornerup eqqunneqalernera taamaattussaannartut isigilersoorsimagaat. Isumaqarpunga ilungersoqatigiissimaneq taanna qujassutigisariaqartoq, taammakkaluartoq kisianneqartitsivoq.
- Kisianni aamma isumaqarpunga ilikkarfivut ilinniagassaannik tunisinnaagigut, nunatsinni aaqqissuusseqqinnissatsinnut nukissaqarluaratta, Juliane Henningsen oqarpoq.
Imalu Lars- Emil Johansenip akivaa:
- Uanga Julianemut oqarusuppunga inuusuttunullu kalaallinut allanut: "Takanna, tassa siunissarput pillugu ilissi sulinissassinnut tunngavissarsi maannakkut naammassivoq".
- Nuannaarutigisorujussuuara inuusuttunut taamatut toqqissisimallunga eqqissisimallungalu suliannik naammassinninnera pillugu oqarsinnaagama: "Takanna, suliassaq ingerlateqqinniarsiuk. Tassa kiffaanngissutsimut matuersaat akisussaassutsimut matuersaat, Namminersornermut matuarsaat maannakkut inuusuttut tiguaat, Lars-Emil Johansen oqarpoq, imalu naggasiilluni:
- Aamma isumaqarpunga oqarsinnaallunga: "Maannakkut nunarput upernarpoq, aamma politikkikkut upernarpoq. Upernaamilu inuusuttut qiimasaqaat, inuusuttut takanna qiimallusi nunarput sullinniarsiuk!", Lars-Emil Johansen kaammattuivoq.
Folketingimi ilaasortat 99-it namminersorneq pillugu taasitsinermut akuersipput, Dansk Folkepartip ilaasortaatitai 18-it naaggaartut.
Namminersorneq pillugu inatsit nalunaaqqutaq 9.15 akuerineqarmat, Namminersornerullutik Oqartussani erfalasut amuneqarput, Naalakkersuisut Siulittaasuat Hans Enoksen aamma pilluaqqusivoq:
- Inuiaat kalaallit iluunngarlunga qamannga pisumik pilluaqqungaarpakka.
Ullormi matumani inatsisip pivisunngortinneqarnissaa anguniarlugu suleqataasimasorpassuit qamannga pisumik pilluaqqussallugit.
