Namminersornerup eqqunneqarnera Saaminit nuannaarutaassaaq

Tusagassiortut nunanit allaneersut Nunatsinneerrapput, Nunatta Namminersornerunermiit Namminersornermut ikaarsaarnera malinnaavigiartoramikku.

Tusagassiortoqarporli kalaallit kulturiannik inooriaasiannillu soqutiginnilluinnartunik malinnaarusuttunillu. Soorlu Kai Arne Ulriksen, Norgimeersoq. Taanna Saamiuvoq, inuullu inuiaqatigiillu pissusiinik Norgimi Tromsøp Universitetiani ilisimatusartuulluni.

Kulturi aqqutigalugu inuiaqatigiittut immikkuullarissutut imminut nittarsaattarneq taassuma ilisimatusaatigaa, Saamiugamilu tamanna immikkut soqutigisaralugu.

Namminersornerup eqqunneqarnera, Nunattalu nunasiaataasimanera immikkut soqutiginaateqarmat, Kai Arne Ulriksenip tamanna ilisimatusaatigaa.

Kalaallit Nunaat pillugu Nunatsinnukannginnermini annertunerusumik ilisimasaqanngikkaluarpoq, nunanili killerni najugallit eqqarsartarnerattut nammineq isumaqarsimagaluarpoq Kalaallit Nunaanni ajornartorsiuterpassuaqartoq, piniartoqartartoq pinngortitarsuarlu kusanarluinnartoq.

Kalaallilli Nunaanni ajornartorsiutaannarnik peqartoqarnera ilumuunngitsoq, sivikitsuinnarmik tamaaniinnikuugaluarluni maluginiarpaa.

Kulturikkut suliniutit amerlanerat uissuummissutigisimaqaa, Saamillu Norgip avannarpasinnerusortaaniittut assigipajaarlugit inooriaaseqartugut Kai Arne Ulriksen isumaqarpoq.

- Inuit qiimaasuupput, inussiarnersuupput, oqaluttuarumatuujullutillu. Soorlu Saamit taamaattut. Danmarkiminngaanniilli sunnersimaneqarneq pissutaalluni inunnguit ilaasa kalaallisut oqaatsitik annaasimavaat. Saamit akornanni aamma taamatorluinnaq ittoqarpoq, Kai Arne Ulriksen oqarpoq, nangillunilu:

- Danskinut qujamasuuteqartutut taaneqarsinnaasut amerlanerit utoqqaanerupput, inuusunnerilli 40-t 60-illu akornanni ukiullit, isumaqarput danskit sunniuteqaataat annertuallaarnerata kingunerisaanik kulturikkut annaasimasat annertoqisut, Norgimeersoq oqarpoq.

Inuusuttut Kalaallit Nunaata Namminersulernerata nalaani inuusut allaanerusut taassuma oqaatigaa:

- Kalaallisut oqaluttoqarsinnaavoq, danskisullu oqaluttoqarsinnaalluni, suminngaanneersuunerli pingaartinneqarpoq. Namminersornerunerup nalaani peroriartorput, politikkikkut suliat pingaartitallu allaanerummata. Annertunerusumilli akerliunissartik pissutissaqarsorinngilaat kalaaliunertimmi nalunngilaat, Kai Arne Ulriksen Radioaviisimut oqarpoq.

Namminersornerup Kalaallit Nunaannut eqqunneqalernera Kai Arne Ulriksenip nuannaarutigaa, Saamillu allat tamatuminnga sapaatiuppat tusagaqartut nuannaassasut Kai Arne Ulriksenip qularutiginngilaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat