Namminersorneq oqaluttuarisaanermut pingaarutilik

- Inuiaqatigiittut siunnerfimmut nalusatsinnut periarfissanut navianartunik akisussaaffimmillu useqarluta Namminersornerunerup tunniussaatigoorluni taamanikkut ingerlasinnaanngorpugut, Inatsisartut siulittaasuat Josef Motzfeldt aallartippoq.

Ukiunut kingullernut 30-nut qivialaarpoq, oqarluni ullut nalaassimasat soorunami erloqinermik artornartorsiorfiusunillu pisoqarfiusartut, maannali inuiaat nutaamut alloriartussanngortut.

- Isumannaassavarput Kalaallit Nunaanni nunatsinni naapitassaajuassasoq inooriaaseq qaquguluunniit takussutissiisoq - inuup nakkaannajuissusaanut nukittussusaanut aamma kusanassusaanut, Josef Motzfeldt oqarpoq.

Statsiministeri Lars Løkke Rasmussen Inatsisartut ataatsimiittarfiannit aamma inuiannik kalaallinik pilluaqqusivoq, oqarluni tassa Kalaallit Nunaat siunissamut pissanganartumut allorialersoq.

Taava Dronning Margrethep Namminersorneq pillugu Inatsit tunniuppaa.

- Det er et stort øjeblik, også for mig at kunne overrække selvstyreloven til Dem og dermed til det grønlandske folk. Tillykke.

Tunniunneqareermat inatsisartut ataatsimiittarfianni hurrartuunneqarpoq. Tunniussineq naammassereermat Naalakkersuisut siulittaasuat Kuupik Kleist aamma Danmarkip ministeriunera Lars Løkke Rasmussen tusagassiortunik katersortitsipput.