Namminersorlutik Oqartussat utaqqisaalerput

- Isumaqatiginninniarnerit aallarteqqinnissaat soqutigisaraarput, taamaattumik illuatungeriit tamarmik iluarisinnaasaannik piumasaqaammik tunniussivugut, Attaveqaammi siulittaasoq Jonathan N. K. Petersen oqarpoq.

Piumasaqaatisi appartippisigit?

- Isumaqatiginninniarnerit  aallarteqqinnissaat kissaatigalugu taamatut naaperiaavugut, neriulluta illuatungitsinnit tigulluarneqassasoq, Jonathan N.K. Petersen oqarpoq.

Massakkut juulleriartornera piumasaqaatinik appaanissinnut attuumassuteqarpa?

- Naamik taamatut oqaatigineqarsinnaanngilaq, suliassavut amerliartuinnartut eqqarsaatigalugit akisussaaqataanitsinnik takutitsineruvoq, Jonathan N. K. Petersen oqarpoq.

Kisianni piffissap sivitsoriartornera Namminersorlutik Oqartussanut iluaqutaavoq, tassami juulleriartornerani aningaasartuutit teknikerit atugaannut sanilliullugit kipiluttunartuunngimmata.

Neqeroorutigineqartoq Namminersorlutik Oqartussanit akuerineqassanersoq suli paasinarsinngilaq, tassami isumaqatiginninniartarfimmit tusagassiuutinut oqaaseqartoqarumanngilaq.

Aningaasarsiat pillugit isumaqatiginninniarnerit illuatungeriinnit itinerusumik aamma oqaaseqarfigineqanngillat.