Namminersorlutik Oqartussat EU-mut nutaamik isumaqatigiinniaqquneqartut
![](/sites/default/files/styles/image_934x467/public/article_images/ga3.jpg?itok=bRdfUfeo)
Nunatsinni Sulisitsisut Peqatigiiffianni pisortaq taama isumaqarpoq.
Taassuma Namminersorlutik Oqartussat EU nutaamik isumaqatigiinniaqqullugit kajumissaarpai.
- Unammillerneq annerulissaaq. Tamanna qularutissaanngilaq. Europami niuverfinni kalaallit tunisassiaat tatineqassapput, Sulisitsisut Peqatigiiffianni pisortaq Brian Buus Pedersenip EU'p Canadallu isumaqatigiinniarnerat pillugu taama oqarpoq.
Isumaqatigiissutip kingunerissavaa tunisassiat Canadameersut akitsuutaat arriitsumik appartikkiartorneri. Taamaalilluni ajornannginnerusumik Canada aalisakkanik tunisassianik EU-mi ilaasortanut tunisisinnaalissaaq.
Tamannalu Kalaallit Nunaannut ajorluinnartoq Brian Buus oqarpoq.
Kalaallit Nunaata Europamut tunisartagaanut Canadamiut raajartaat allallu akikinnerulissappata, taava unammillerneq sakkortusissaaq. Imaappoq Danmarkip/Kalaallit Nunaatalu EU-mut illugiilluni niueqatigiinnissamik isumaqatigiissutaat soorunami nalikinnerulissaaq.
Kalaallit Nunaannili aalisakkanik avammut niuertut annersaanni pisortaaneq Michael Thinghuus taama aarleritiginngilaq.
- Niueqatigiinnissamik isumaqatigiissutaareersumi raajat Canadameersut EU-mut eqqussorneqarluareerput, taakkulu unammilleqatigeereeqaagut. Aamma canadamiut raajartassaat appariartorput. Taamaattumik uanga isumaqarpunga kingunissai taama ingasatsiginavianngittut.
Taakku saniatigut Royal Greenland Kangiamiunut niuernerat annertusigaluttuinnarpoq.
Taammaakkaluartoq Michael Thinghuusip Nunatsinni Sulisitsisut Peqatigiiffiata kaammattuutaa taperserpaa, tassalu kalaallit aalisakkanik tunisassiaasa pitsaanerusumik isumaqatigiissusiuunneqarnissaat Namminersorlutik Oqartussat EU-mut isumaqatigiissutitigut pitsanngorsaavigisariaqaraat, Brian Buus ima oqarpoq:
- Isumatigiissullu Kalaallit Nunaannut ajorseriassappat taava arlaatigut isumaqatigiinniarnermi ajunngitsorsiinermik taarsertariaqarpoq. Tassaavoq uanga siunnersuutiga, Buus oqarpoq.
Canadap EU-llu aporfeqannginnerusumik niueqatigiinissamik isumaqatigiissutissaat EU'p niuevernermut ministeriisa ullumi marlunngornermi ataatsimiissutigaat.