Namminersorlutik Oqartussat coronap tunillaassuussinnaanera pillugu: Juullimi angalanissat pinngitsoorniakkit
Nunatsinni coronamik sapaatip-akunnerata missaani tunillatsissimasoqanngilaq. Ullumili pingasunngornermi tunillatsissimasumik nutaamik uppernarsaasoqaqqippoq – tamatumuuna Aasianni.
- Piffissap sivikitsup ingerlanerani tunillatsissimasunik pingasunik nassaarpugut. Maanna Kalaallit Nunaanni tunillaassueriaannaaneq ersarissorujussuanngorpoq, Namminersorlutik Oqartussat allapput.
Nunatsinnilu ataatsimik tunillatsissimasoqarnera Danmarkimi pissutsinit allaanerulluinnarpoq: Danmarkimi tunillatsissimasutut pingasunngornermi unnukkut uppernarsarneqartut 994-iupput.
Naalakkersuisut nunatsinnut tikittut tikinnerminnit ullut tallimat qaangiunneranni misissorteqqittarnissaannut malittarisassat atuutilerseqqinnikuuaat.
Angerlarsimaannarninni pisuttuarsinnaavutit aamma najugaqatigisannut qanillisinnaavutit.
Niuerniarsinnaavutit.
Allanut pulaassanngilatit, pulaartoqassanngilatit, bussissanngilatit, taxassanngilatit suliartussanallu.
Nunatsinnut tikinnermi ullut tallimat qaangiunneranni misissorteqqissaatit. Misissortinnerup tunillatsissimannginneq uppernarsarpagu suliartoqqissinnaavutit nalinginnaasumillu inuunerit ingerlateqqissinnaallugu.
Misissorteqqinnianngikkuit ulluni 14-ini angerlarsimaannassaatit aatsaallu ersiuteqanngikkuit suliartoqqillutit.
Danmarkimi coronamik napparsimasut 40-t peruluttut uninngavianni innangapput, taakkunannga 22-t anersaartornissaminnut anersaartuummik ikiorserneqartariaqarlutik.
AAMMA ATUARUK Coronamik tunillatsissimasumik Aasianni uppernarsaasoqaqqittoq
Coronamillu tunillaassuunneq pissutigalugu nunatsinnit nunatsinnullu juullikkunni angalasoqartariaqanngitsoq, Namminersorlutik Oqartussat nalunaaruteqarput.
- Kalaallit Nunaanut tikittartut amerliartortillugit, Kalaallit Nunaanni tunillaassuisinnaaneq annertuneruleriartussaaq. Taamaattumik Namminersorlutik Oqartussanit suliffeqarfiit, oqartussaasut innuttaasullu Kalaallit Nunaannut aamma Kalaallit Nunaanniit pisariaqanngitsumik angalasoqassanngitsoq kaammattuutigineqarpoq. Tamanna pingaartumik aamma juullikkunni atuuttariaqarpoq, Namminersorlutik Oqartussat Facebookikkut allapput.
- Maanna takuneqarsinnaasut malillugit juullikkunni angalasussat amerlavallaarput. Pingaartumik sapaatit akunneranni 51-imi, aammalu sapaatit akunneranni 2-mi inuit Kalaallit Nunaannut uterlutik angalasussaapput, Namminersorlutik Oqartussat paasissutissiipput.
Nunatsinnut tikinnermi ulluni tallimani angerlarsimaannartoqassaaq.
Tikinnermiillu ullut tallimat qaangiunneranni misissorteqqittoqassalluni. Nunatsinnut sapaatip-akunnerani 51-imi tikittut angerlarsimaannarnissamut malittarisassat naammassisinnaanavianngilaat. Taamaammat angerlarsimaannarlutik tuttutorlutillu ris a la mandetortariaqassapput.
Taamaaliunngikkunimmi allanut tunillaarataartoqarnissaanut aarlerinartoqarpoq.
AAMMA ATUARUK Aasiannut sukannersumik suli ukkatarinninneq: 15-it tunillatsissimasinnaasut
Coronamik tunillatsissimasutut uppernarsarneqartut marluk kingulliit Aasianniittut nunatsinnut tikinnerminnit ullut tallimassaanni misissortinnikkut paasineqarput. Tassa imaappoq Københavnimi timmisartorsuarmut ikinnginnerminni tunillatsissimannginnermut uppernarsaateqarsimapput – taamaakkaluartorli nunatsinnut tikinnerminnit ullut tallimat qaangiuttut tunillatsissimasutut uppernarsarneqarput.
- Taamaattumik juullikkunni tikittartut, aammalu ukiortaareerpat inuit uterarlutik angalasussat ikilisinniarlugit misissuisoqarpoq. Allammi misissorteqqereeraluarlutik peqqissusissaq eqqarsaatigalugu tikinnermiit ullut 14-it tikillugit qanillinaveersaarnissaq inassutigineqarpoq, Namminersorlutik Oqartussat allapput.
Nunatsinni tunillatsissimasutut uppernarsarneqarsimasut maanna katillugit 18-iulerput. Tunillatsissimasunit 17-it peqqisseqqissimapput - taakkunanngalu arlaannaanilluunniit napparsimmavimmut uninngatitsisoqarsimanani.
Angalanissat pisariaqanngitsut suuppat?
- Sulinngiffeqarluni angalanerit
- Sulinermut atatillugu angalanerit sulinermut pisariaqavinngitsut
- Sulinermut atatillugu angalanerit, siunertaasumik oqarasuaatikkut imaluunniit videokkut angusaqarfiusinnaasut
- Innuttaasut, suliffeqarfiit oqartussaasullu ataasiakkaat namminneerlutik angalassanerlutik aalajangiisussaapput.
