Namminersorlutik Oqartussat aningasaqarniarnerat tukkattoq
Nunatta Karsiata naatsorsuutaani 7,7 millionit koruunit ilaatigut amigaatigineqartut, Sermitsiami ullumi saqqummersumi atuarneqarsinnaavoq.
Namminersorlutik Oqartussat ukiumoortumik naatsorsuutaannut atatillugu kukkunersiuinermut oqaaseqaammi saqqummeqqammersumi isornartorsiuineq erserpoq.
- Akileraarutinit isertitat, minnerunngitsumillu piffissami aalajangersimasumi ileqqaarutigineqartartut, qanoq amerlatigerpiarneri ataatsimut isigalugit nalorninarpoq, nalornissutigineqartullu naammaginartutut taaneqarsinnaasunit amerlanerullutik, kukkunersiuisartut, Deloittip Nuummi immikkoortortaqarfianeersut, Peter A. Wistoft, aamma Claus Bech, oqarput.
Inuittaaq, Nunatta Karsianut akiitsullit, allattorsimaffii nalorninartoqartorujussuupput atorneqarsinnaanatillu, tassa aningaasat qanoq amerlatigisut Namminersorlutik Oqartussat akileraartartunit pissarineraat naatsorsorneqarsinnaanani.
- Naatsorsueriaatsit pitsaassusaat ataatsimut isigalugu ukiunut siuliinut sanilliullugu appariarsimasoq, uagut naliliivugut, Peter A. Wistoft Claus Bechilu taama erseqqissaapput.