Namminersorlutik Oqartussat ammanerulissamaalerput
- Suut tamarmik avammut saqqummiunneqarnissaat neriorsuutigisinnaanngilara, pissuteqavilluta mianersorfissaqaratta. Taamaattumik saqqummiussinissatta sillimaniarnermut innarliinginnissaa sapingisamik mianersuutigaarput, Naalakkersuisut siulittaasuat Kuupik Kleist sapaatit akunnerisa marluk matuma siornagut Radioaviisimut taama oqarpoq.
Naalakkersuisut siulittaasuata oqaatigaa, ullumi saqqummiussinikkut, sillimaniarnermut pilersaarutinik isertuussinermut isornartorsiuinerit iliuuseqarfiginiarneqartut.
Isornartorsiuinerni sakkortusaarnerpaasut, avatangiisinik illersuiniaqatigiit Greenpeace-kkut saqqummiussinissaq pissangallutik utaqqivaat, annerusumilli ilimasuuteqaratik.
- Kalaallit Nunaata imartaaniit ilumut uulia qanoq ililluni qallorneqarsinnaassanersoq, immitsinnut aperiuarpugut, tassa taanna apeqqutip qiterisaa akineqartariaqartoq, tassa uuliamik maqisoortoqassagaluarpat tamanna Cairn Energyp qanoq ililluni piiarsinnaassaneraa, silap pissusaanik sulialik Jon Burgwald Greenpeace-meersoq siusinnerusukkut oqarpoq.
Tamanut ullumi saqqummiunneqartut, Inuit Issittormiut Siunnersuisoqatigiiffiannit ICC-mit nunani allani periaaserineqartartunut sanilliunneqassapput, tamannalu tunngavigalugu Namminersorlutik Oqartussat ammaassinerat naammmaginarnersoq isummerfigineqassalluni.
