Namminersorlutik Oqartussani pisortat akornanni suleqatigiinneq ilaatigut ilungersunarsimaqaaq
Qaffasissumik atorfilittat marluk akornanni, Namminersorlutillu Oqartussani immikkoortortat akornanni allakkat, Sermitsiap pissarsiarisimavai. Kai Holst Andersenip pissutsinik isorinnissimanera allakkani ilaatigut takuneqarsinnaavoq, tassami Naalakkersuisut siulittaasuata Naalakkersuisoqarfiani pisortaasimasoq Svend Hardenberg naapertorlugu Nunanut Allanut Tunngasunut pisortaqarfimmiut qineqqusaartoqarnerup nalaani ataqatigiissaarisutut pingaarnertut kingusinnerusukkullu ikaarsaariarnermi sulisorissagaanni Kai Holst Andersenip isornartorsiorsimavaa. Sermitsiaq taama allaaserisaqarpoq.
Nunanut allanut tunngasunut pisortaqarfimmi siusinnerusukkut pisortaq naalakkersuisunut siulittaasumik pisortaqarsimavoq, tamatuminngalu allannguineq Kai Holst Andersen naapertorlugu qinersisoqarnissaanik nalunaaruteqartoqareerpat Naalakkersuisut atuunnerat pillugu kaajallaassitamut tamanna akerliusussaasoq:
- Oqartussaaffimmik allannguineq annertooq taanna qinersinissamik nalunaarutiginninnerup kingorna Naalakkersuisut siulittaasuata Naalakkersuisoqarfiani pisortap isumaa malillugu pisimasoq inatsisinik unioqqutitsinerusimassagaluarpoq, tamatumani inatsiseqarneq pillugu allaffimmiut Naalakkersuisunut siulittaasup Naalakkersuisoqarfiani sulisut siunnersuisarfiusussaasimagaluartut, kai Holst Andersen ilaatigut taama allaaserisaqarpoq.
Svend Hardenbergip nammineq ataqatigiissaarisunngornini Naalakkersuisoqarfinni allani pisortanit tamanit akuerineqarsimasoq emailikkut tamanna sioqqullugu oqaatigisimavaa, Nunanullu allanut tunngasunut pisortaqarfimmi pisortaq ataatsimiinnerni arlalinni Pituffimmi kiffartuussinissamik isumaqatigiissummik annaaneqartumik suliarinninneq Naalakkersuisullu siulittaasuata Naalakkersuisoqarfiani sulisut Nunanullu allanut tunngasunut pisortaqarfimmiut, piffissami tamatumani Namminersorlutik Oqartussani quleriit qulingiluaanni allaffeqatigiittut, akornanni pissutsit Kai Holst Andersenip ajornartorsiutinngortittarsimagai, Svend Hardenbergip aamma oqaatigaa, Sermitsiami tallimanngormat saqqummersinneqartumi ilaatigut taama allaaserisaqartoqarpoq.
