Nammattagaq atorlugu angalasuni utoqqaanerpaap nunarput takorloorpaa
Tuluk 89-inik ukiulik John Waite ukiuni 30-ni nunarsuatsinni sumi tamaani angalasimavoq, ilimagineqarlunilu nunarsuatsinni nammattagalisarluni takornariartartut utoqqaanersarissagaat. Taassuma nunarsuarmi angallavigerusutani tamakkissagunigit taamaallaat amigaatigilerpai Nunarput, Argentina Manerassuarmilu qeqertat arlaqanngitsut.
- Nuliama 1982-imi toqunerata kingorna ukioq ataaseq qaangiummat angalasalerama. Taamani soraarninngorama, arlaannillu iliuuseqarusulerlunga. Inuppassuit isumaqartarput suliunnaaraani inuuneq tamaanga killeqartartoq, kisianniliuna aatsaat inuuneq aallartittartoq, tassami nammineq kissaatigisat naapertorlugu qanorluunniit iliornissannut piffissaqalertarputit, Waite oqarpoq.
Hollywoodimi filmiliassanik allaaserinnittartut saqqummersitsisartullu, taassuma oqaluttuariniagaa oqaluttuariumallugu pilerigisorujussuuaat, taannali oqaluttuarnissaminut suli piariinngilaq. Tassami angalaffiginiakkaminik suli amigaateqarami.
John Waite maanna siullerpaamik Islandimiippoq.
Aamma naak 89-inik ukioqaraluarluni oqarpoq, angalanissaminut ukiunut tulliuttunut 15-inut pilersaaruteqarluni, angalaffiginiakkaminilu kissaatiginerpaasaanut Nunarput ilaavoq.
