Nam. Oqar: Ukiorpassuarni eqqunngitsumik tunngaveqartitsimavagut
Tassa suleqatigiinnerat taamaatiinnarneqarsinnaavoq, tassalu matutinneqarnissaanik Namminersorlutik oqartussat pisussaaffeqaratik.
Tamanna pillugu Ilaqutariinnermut naalakkersuisoqarfimmi meeqqat inuusuttuaqqallu immikkoortortaqarfiani qullersaasoq Kirsten Olesen ullumi ima oqaaseqarpoq:
Iliuuseqartoqarsimanermimi ilumut eqqunngitsuliortoqarsimanera Ombudsmandip naqissusereerpaa, taammammallu iliuuserineqartut allanngortariaqassavagut. Tassa uagut akuersisussaatitaanata isumaqatigiissusiuinnartussaatitaavugut, Kirsten Olesen oqarpoq nangillunilu:
Tamannarpiaq pillugu inatsisit juulip aallaqqaataani 2003-mili atuutsinneqalerput.
Tassa taamanerniilli ulloq unnuarlu paaqqinnittarfiit akuerineqartarneri ingerlanneqartalersimapput, tassa isumaqatigiissusioraanni taava akuersissummik tunniussisoqartarnissaa pissusissamisoorsorineqarsimagaluarpoq.
Aamma sooq taamatut suleriuseqartoqarsimanersoq oqaatigisinnaanngilara, ilami suleriusaasoq apeqquserneqarsimanngisaannaramiluunniit, taamaamat taamaattussiaannartutut isigineqarsimagaluarpoq, Kirsten Olesen oqarpoq.
Ulloq unnuarlu paaqqinnittarfik 2009-mi matuneqarniariarmat paaqqinnittarfimmik pilersitsisoq forstanderiusimasorlu taamanerniilli Ombudsmandimut naammagittaalliuteqarpoq, taamatullu matusiinnarneq inatsisinik unioqqutitsinerusoq oqaatigalugu.
Ukiulli marluk qaangiummata ulloq unnuarlu paaqqinnittarfik alla, tassa umiarsuaaraq Tûgdlik asserluinnaanik pineqarluni matuneqarpoq.
Tassa ulloq unnuarlu paaqqinnittarfittut akuersissutaat Namminersorlutik oqartussanit atorunnaarsinneqarpoq, uffa maleruagassat malillugit taamaaliortussaatitaanatik.
Taamaariarmat pisoq siulleq qassiiliutaalermalli Naalakkersuisoqarfimmi arlaatigut kukkusoqarsimaneranik pasitsaassisimanersut aperigatsinni ima akissuteqarput:
Aap. Ombudsmandimut naammagittaalliuteqarneq allaavoq, Ombudsmandilu suliaq pillugu oqaaseqarpat aamma allaalluni.
Tassami Ombudsmandi suliaminik ingerlatitsisillugu utaqqeqqaartariaavoq, tassa utaqqiinnartariaqarsimavugut.
Kirsten Olesen taama akissuteqarpoq, Naalakkersuisoqarfiullu taamatut matusisariaqalersimanera aappaatigut aamma illersorlugu, taassumami isumaa malillugu ulloq unnuarlu paaqqinnittarfinni meeqqanut atugassarititaasut naammagiinnarneqarsinnaanngimata.
Qanorliuna kukkunitik iluarsiiffiginiaraa?
Ulloq unnuarlu paaqqinnittarfinni atugassarititaasut ajunngittuunissaat qulakkeerniarlugu attaveqarfigisalissavagut, ilami ulloq unnuarlu paaqqinnittarfiit namminersortunut allarpassuarnut una suliaq attuumassuteqarpoq, tassa tamavimmik attaveqarfigisariaqassavagut isumaqatigiissusiorfigalutigillu.
Suliarlumi taannarpiaq maanna aallartinnialerparput, Kirsten Olesen taama naggasiivoq.
