Martha Tasiilameereerluni: Nalunaarusiat avataasigut paasisimasaqarnerulinngilanga

Isumaginninnermut Naalakkersuisoq Martha Abelsen, Tasiilamut angalanermini innuttaasunik ataatsimiisitsivoq, susassaqartut naapippai, politiit, peqqissaavik, kommunalebestyrelsimut ilaasortat Tasiilamiittut najukkamilu ataatsimiititaliami ilaasortat. Taakkua saniatigut meeqqat atuarfianni oqaloqateqarnermut piffissaq sivisooq atorpaa.

Meeqqat illersuisuata nalunaarusiaani, Naalakkersuisullu nakkutilliinermit nalunaarusiaasa avataatigut Isumaginninnermut naalakkersuisoq Tasiilamut angalanermini paasisaqarnerulinngilaq.

- Naamik. Nalunngilara aamma aallaqqaammulli piareersaaninni oqartuaannarpunga paasisat maannamut pigisagut naammaqaat, Martha Abelsen KNR-imut oqarpoq.

Danmarkimut ikoqqunissaq suli nalornissutigaat
Naalakkersuisut nunatsinni meeqqat inuusuttullu atugarliortut pillugit Danmarkimut ikioqqunissaannik piginnaatitsissummik Inatsisartut Ilaqutariinnermut peqqissutsimullu ataatsimiititaliaata ullumi tunivaat.

 Ataatsimiititaliaq ikioqqunissaq pillugu tigussaasunik naalakkersuisunut suliakkiinngilaq.

 - Atsioqatigiippugut ataatsimiititaliami, naalakkersuisoq pisinnaatillugu, taannalu pisinnaatitsissut Naalakkersuisut kommunit suleqatigalugit suliassaq ingerlatissuaat,)) Inatsisartut ilaqutariinnermut peqqissutsimullu ataatsimiititaliaanni siulittaasoq, Laura Táunâjik oqarpoq.

Isumaginninnermut naalakkersuisoq ikiorneqarnissap qanoq ittuunissaa pillugu Kommuneqarfik Sermersuup borgmesteria Asii Chemnitz Narup sisamanngorpat oqaloqatigissallugu oqaatigaa.  Martha Abelsenip Tasiilamut angalanini iluaqutaassangatippaa.

- Qanoq ikioqqunissamik ilusiliinissamut, pinngitsoorani angalasimanera sunniuteqassaaq, Isumaginninnermut naalakkersuisoq Martha Abelsen oqarpoq.