Nalunaarusiaq: Issittup imartaa iluaqutaarujussuarunnanngilaq
Naalagaaffeqatigiit imarsiornermik inuussutissarsiortuupput, imaani iluanaarutinik ataavartunik ukiorpassuarni naalagaaffittut atugarissaarfiusutut ingerlasimavugut. Kalaallit Nunaannulli Danmarkimullu issittup imartaata siunissami qanoq annertunerusumik aningaasarsiutaasinnaava?
Apeqqut taanna suliffeqarfiup Nirasip siunnersortaasa Imarsiornermut Qullissaqarfik sinnerlugu akiniarsarisimavaa. Suliffeqarfiit atorfillillu Nunatsinniittut Danmarkimiittullu apersortarsimavaat. Akissutaalli qiimmannartuusimanngillat.
Nunatta ungasissuani ineriartortitsineq
Nirasip siunnersortai naliliipput, imaatigut angallaffissat eqqarsaatigalugit kalaallit suliffeqarfiutaannut qaffassaataanavianngitsut. Issittup imartaani, Sullualukkulluunniit imaatigut angalaffissat Nunatsinnut imatorsuaq iluanaaruteqarfiujunnanngillat.
Issittup imartaani siunissaq qanittoq isigalugu angallannerulernissaq Nunatsinnut naleqqiullugu; Norgep, Ruslandip Canadallu imartaanni pinissaa ilimanarnerusoq Nirasimi siornersortit nalunaarusiaanni Imarsiornermi qullersaqarfimmut tunniussimasaanni erserpoq.
Polarkode sulisussaaleqinerlu ajornartorsiutaapput
Issittup Imartaani inuussutissarsiornermi unammilligassanut annerpaanut ilaasoq tassaavoq ilinniarsimasunik sulisoqarniarneq. " Umiarsuarni, umiarsuaatillit allaffiini atortussiorfinnilu Issittumi imarsiortutut piginnaasalinnik pisariaqartitsinerulissapput" nalunaarusiortut allassimapput.
Issittup imartaani angalasinnaanermi piumasaqaatit sukaterneqarneri "Polarkode"mik taagukkami aningaasarsiornerulernissamut unammilligassanut ilaapput.
Isumaqartoqarsinnaagaluarpoq imartat kiatsinnerulernerisa piumasaqaatit annikillisissagaat, polarkodelli Issittumi suliffeqarfiliornissaq akisunerulersissimavaa. Maanna umiarsuit siusinnerusumut naleqqiullugu qajannaallisarneqarnerulissapput. Nalunaarusiap aamma uparuarpaa ikummatissat akitsornerat, attaveqatigiinnernullu qaammataasanullu akissaajaatit annertuut issittumi imartani iluanaarniartoqarsinnaanera pinngitsoortissagaat.
Inuit attuumassuteqartut 42-t apersorneqarsimapput
Nunat assigiinngitsut akornanneersunik umiarsuarnik takornariartitsinerit iluanaarniutaasinnaanngillat, nunat allat naammattunik tamakkunannga ingerlataqarmata, siunnersortit tikkuaapput. Danmarkimi Nunatsinnilu namminersortuni pisortanilu assigiinnik suliallit 42-it siunnersortit apersorsimavaat.
Nalunaarusiami innersuussutigineqarpoq, suliffeqarfiit Issittumiittut imaani inuussutissarsiutinik ingerlatsisut aningaasarsiornerulernissaannik siunnersornissaat Danmarkip Nunattalu pikkorinnerulerfigissagaat; aammalu imarsiortunngornianik ilinniartitsinerit, ilinniartitseqqinerillu nukittorsarlugit. Suliffeqarfiit tamaalillutik piginnaaneqarnerusunik sulisoqarnermikkut unammillerluarnerusinnaaniassammata. Nirasimi siunnersortit allapput.
