Nalunaarusiaq apeqqusiivoq
Suliarlu soqutiginarpoq. Mimi Karlsenip akissutaani erserpoq ajornartoornermi ikiuutitut toqqaannartumillu tapiissutitut Sermitsiaq.AG millionit aappaata affaanik koruuninik pisimasoq. Taakku saniatigut aviisit taakku marluk toqqaannanngitsumik 1,6 millioni koruuninik tapiiffigitissimapput. Tassa Namminersorlutik Oqartussat ussassaaruteqarneranni landskassip aningaasaatai atorneqarlutik.
Anda Uldumip tamanna tunngavigalugu paasivaa tusagassiutit pillugit nalunaarusiami takuneqarsinnaasoq - Anda Uldumip allanneratut - innuttaasut pingajorarterutaannaasa Sermitsiaq atuartaraat, sisamararterutaannaasalu AG atuartaraat. Tamakku aallaavigalugit apeqquterujussuaq akissutissarserusunnartoq tassaavoq: Aviisini taakkunani marlunni Namminersorlutik Oqartussanit suliffissanut inuttassarsiuussinerit naqinneqartassappata aviisit qanoq atuartartoqartiginissaat naleqquppa?
Mimi Karlsenilli tamanna toqqaannartumik akinngilaa. Nassuiaatigaali Namminersorlutik Oqartussat ussassaaruteqarnissaaannut aviisi qanoq atuartartoqartigissanera aalajangersagaanngitsoq.
Oqarneratut tusagassiutit sullinniagaat, tusagassiuutinik atuisut amerlassusaat ussassaarutillu akiminnut naleqqiullugu sunniutaat nalilersorneqartuaannartut. Tamanna tusagassiutinut nunatsinneersunut, sulianut aalajangersimasunut tusagassiutinut, tusagassiutinut Danmarkimeersunut tusagassiutinullu allanut atuuppoq.
Mimi Karlsenip aalajangersimasumik oqaatigaa, Namminersorlutik Oqartussat ukioq manna marsip 15-iani Tusagassiuuteqarfik Sermitsiaq.AG-mut isumaqatigiissummik immersugassamik taasaminik isumaqatigiissuteqartoqartoq, ussassaarutinik quppernerup affaanik angissuseqartunik 80-inik aviisinut 20-nut tusagassiuuteqarfiup saqqummersitassaanut ilaasussanik.
Landskassemut tamanna qanoq akeqassanersoq, Mimi Karlsenip akissutaani ersinngilaq.
