Nalunaarusiami innersuussutit ukioq ataaseq ingerlareersoq tamakkiisumik naammassineqanngitsut
Canadami nunap inoqqaavisa arnartaat periarfeerunneqarsimanngikkunik toqutaasimasut pillugit nalunaarusiaq saqqummersinneqarmalli ulluni makkunani ukioq ataasinngorpoq.
Coronalli ajornartoortitsinerata kingunerisaanik nalunaarusiami innersuussutigineqartut katillugit 231-t tamakkiisumik naammassineqarsinnaasimanngillat.
Ammip qalipaataa aallaavigalugu Canadami, USA-mi nunanilu allani nakuuserniartarnerit unitsinniarneqarnissaat, naggueqatigiit Inuit suliniaqatigiiffiata Inuit Tapiriit Kanatamip tapersersorpaa.
AAMMA ATUARUK Nunatsinneersut USA-mi najugallit akerliussutsimik takutitsinerit pillugit: Ernumanarput
Ammit qalipaataat aallaavigalugu naapertuilluanngitsuliornerit unitsinneqarnissaasa USA-mi inuit amerlasuut kaammattuutigileruttoraat, Inuit Tapiriit Kanatami præsidenti Natan Obed taama oqarpoq.
Ammit qalipaataat aallaavigalugit nikassaasarnerit unitsinniarlugit USA-mi akerliussutsimik takutitsinerpassuit tunuliaqutaralugit, naggueqatigiit Inuit nunallu inoqqaavisa allat Canadami naapertuilluanngitsuliorfigineqartarnerat Natan Obedip eqqaavai, nunap inoqqaavisa arnartaat pillugit nalunaarusiaq tikkuarlugu.
AAMMA ATUARUK Arnat toqutaasimasut pillugit nalunaarusiaq piareertoq
Nunap inoqqaavisa arnartaat niviarsiaraallu naapertuilluanngitsuliorfigineqartarnerat pillugu akiuiniarnermut peqataaniarnini, Inuit Tapriit Kanatamip oqaatigaa:
- Naapertuilluartumik suliniuteqartoqarnissaa pillugu nalunaarusiami innersuussutit eqquutsinneqarnissaat uanga ullumi ullunilu allani tunniusimallunga sulissutiginiarpakka, Natan Obed oqarpoq.
Coronap ajornartoortitsinera pissutaalluni killilersuinerit assigiinngitsut naggueqatigiit Inuit arnartaasa naapertuilluartumik pineqarnissaannut nalunaarusiami innersuussutit 231-t tamakkiisumik naammassineqarsinnaasimanngillat, suliarli maanna nanginneqartussanngorluni.