Naliliisartoq: Politiki qinersinermi apeqqutaassanngilaq

Tatiginassutsimik takutitsineq qinersinermi aalajangiisuussaaq - politikikkut ilisarnaatit pinnatik. Kisianni taamaakkaluartoq Demokratit Atassullu IA-p Siumullu ilaasortaatitaat taarserniarunikkit qineqquusaarluavissortariaqarput, Henrik Skydsbjerg naliliivoq.

- Qineqqusaarnerup aallartilaarnerani IA Siumullu qinigaatitaqarnissaat ilimanartutut oqaatigisariaqarpoq, partiillu mikinerusut, Demokratit Atassullu, assoroortariqarlutik, Henrik Skydsbjerg oqarpoq.

Taassumali oqarnera napertorlugu, partiit minnerusut aamma qinigaatitaqarsinnaanissaat ajornavissunngilaq, ilimagisarlu uniorlugu taama pisioqassagaluarpat, Folketingimut qinigaarlaaq nunatsinneersoq politikikkut periarfissaqalissagaluartoq, maannamut sungiusimaneqanngitsunik.

- Qinigaasup aappaa Demokratineersuussagaluarpat Atassummeersuulluniluunniit ilimarpoq, taanna talerperlernut taseqataasassasoq, danskillu partiivi naligiittorujussuuppata, nunatsinnut iluaqutaasumik qinigaarlaaq taanna isumaqatigiinnialersinnaassagaluarpoq, Henrik Skydsbjerg oqarpoq.

Taassumali aamma nassuerutigaa, Atlantikup avannaaneersut taasinerat Danmarkimi naalakkersuisunngortitsinermi apeqqutaavallaassanngitsoq, misissuinerit maanna takutimmassuk. Kisianni periarfissaq taanna sussakkiivissussallugu suli siusippallaartoq, taanna aamma isumaqarpoq.

Tassami politikikkut assigiinngissutit imaaliallaannaq takusassaanngimmata, kina ersarinnerusumik qineqqusaassanersoq suli apeqqutaalluinnarpoq.

- Qineqqusaartut suna qineqqusaarutiginiarneraat suli nalunarpoq. Nunatta soqutigisaanik pitsaanerpaamik aallussisinnaasumik isertoqartariaqartoq maanna isumaqatigiissutigineqaqaaq. Tassalu qineqqusaarnermi qanoq pisoqassanersoq apeqqutaalluinnarpoq, Henrik Skydsbjerg oqarpoq.

Taanna aamma isumaqarpoq, qinersinerup inerneriumaagaa Nunatsinni politikikkut ingerlatsinermut iluarinninnermut iluarinninnginermulluunniit takussutaasinnaassanngitsoq.

- Partiinut tapersersuineq allanngoriartulernesoq takuneqarsinnaassaaq, aammali  qinigassanngortittut imaluunniit qanoq politikeqarneq apeqqutaanersoqnalorninassaqaaq. Qanorli politikeqarneq qineqqusaarnermi soorlu erserpallaarnavianngitsoq. Soorluuna tamarmik assigiikannersumik oqassasut, taavalu kina Folketingimi Nunatsinnut pitsaanerpaamik sullissisinnaasutut tatigineripputapeqqutaalissaaq, qinersinermi naliliisartoq Henrik Skydsbjerg  oqarpoq.

Folketingimut qinersinermi kingullermi IA-p Siumullu qinersisaat Demokratit Atassutillu qiernissaasa marloriaataasa missigaat.