Naliliineq: Namminersorneq aningaasanik aqutsilluarnissamik pisussaaffiliivoq
Namminersornerup atuutilernerani pingaarnersaavoq, nammineq aningaasalersuisinnaaleraangami, akisussaaffinnik Nunatta Danmarkimiit tigusisinnaalernera.
- Politikerit piviusunik paasinnissinnaassuseqarnissaannik piumasaqaatitaqarpoq. Suliassaqarfinnik tigusiumagutta nammineerluta aningaasalersulertussaavarput. Tamannalu aningaasanik aqutsilluarnissamik pisussaaffiliivoq, naalakkersuinermik naliliisartoq Jakob Janussen oqarpoq.
Taanna isumaqarpoq, namminersorneq pillugu isumaqatigiissutip Nunarput Danmarkilu naligiinnerulersikkai.
- Danskit naalakkersuisuinit naalakkisaartinneqarunnaarluta suliassat ornikkivut, Namminersorlutik Oqartussat ilisimaarivaat. Uagummi soqutigisavut danskit soqutigisaannut assigujuaannarneq ajorput, Jakob Janussen oqarpoq.
Silap pissusaa pillugu Nunat tamalaat sinniisaat Københavnimi ataatsimeersuarnerisa, COP15-p, nalaanni Nunatta Danmarkillu akornanni isumaqatigiinniarnerni kingullermik tamanna takuarput.
- Assigiinngitsunik tunngaveqaratta, Danmark sutigut tamatigut maliinnarsinnangikkipput, Naalakkersuisut erseqqilluinnartumik paasitippaat. Aningaasarsiornitta ineriartortinnissaa pisariaqartipparput, taamaalillutalu CO2 aniatitarput allisinngitsoorsinnaanngilarput, Jakob Janussen oqarpoq.
Namminersorlutik Oqartussat namminneerlutik isummertarnertik ingerlatiinnassagaat, taassuma naatsorsuutigaa, soorluttaaq Nunatta aningaasaqarnikkut namminiilernissaanut politikerit sulissasut qularutiginngikkaa.
