Naligiissaarinissaq: utaqqiisaagallartumik aaqqiisoqalerpoq
Naligiissaarinissamut aaqqissuussinissamut nutaamut siunnersuusiortoqassasoq ataatsimiinnermi isumaqatigiissutigineqarpoq - suleriaqqinnissaq aggustip aqqarnanni oqallisigineqassaaq.
- Isumaqatigiippugut paasissutissat siunissami tunngavissat aammalu aallaavissat sorpiaanissaat massakkut amigaataasut, aamma paasissutissat pisariaqartut massakkut pigineqanngitsut, ilaatigut pissutigalugit nalimmassaanissap, siunissaq ungasinnerusoq eqqarsaatigalugu pinissaa pinngitsoornagu misissoqqissaarneqartariaqartoq, Qaasuitsup Kommuneani borgmesteri Ole Dorph taama KNR-imut oqarpoq.
Taamaattumik borgmesterit aamma Vittus Qujaukitsup 2015-imut aaqqiigallarnermik suliaqartoqassasoq isumaqatigiissutigaat.
- Kommunit ippassaq ataatsimiinnermi saqqummiussaat assigiinngissitaartut tunngavigalugit, atorfillit suleqatigiissitaat suliakkinneqarput, toqqaannaq isummerfigineqarsinnaasunik periusissanik assigiinngitsunik aggustip aqqarnanni ataatsimiinnissamut saqqummiunneqartussanik suliaqaqqullugit, Kommune Kujallermi borgmesteri Jørgen Wæver Johansen taama KNR-imut oqarpoq.
Aningaasaqarnermut Naalakkersuisoq Vittus Qujaukitsoq tusagassiuutinut nalunaaruteqarluni allappoq, ataatsimiinnermi tulliuttumi periaasissamik isumaqatigiissuteqartoqarsinnaanissaa neriuutigigini, oqaaseqartinniarneqarunilu sianerfigineqarsinnaalluni oqaatigalugu - ullaap tungaanili KNR-imit oqaaseqartinniaraluaratsigu oqaaseqarumanani. Borgmesterit Asii Chemnitz Narup aamma Hermann Berthelsen pineqartoq pillugu oqaaseqarusunngillat.
