Naleraq Tunumi taaguunneqangaatsiartoq
Naleraq kommunimut qinersinermi uani Ittoqqortoormiuni Tasiilamilu siuariarujussuarpoq.
Ittoqqortoormiuni Naleqqap 84,3 procentinik taaguunneqarpoq, siuariarujussuarporlu. Naleraq kommunimut qinersinermi kingullermi 2017-imeersumi procentinik marlunnik taamaallaat qinersiseqarpoq, innuttaasulli 166-it maanna Naleqqamut qinersisimapput.
Taaguunneqartuni Naleqqamiit qineqqusaartoq Ken Madsen amerlanerpaanik taaguunneqarpoq, Taamaalillunilu Ittoqqortoormiuni Kommuneqarfik Sermersuumi kommunalbestyrelsemi ilaasortanngortussaassaaq.
Siumut 125-inik 2017-imi taaneqarpoq, maannakkullu arfinilinnik qinerneqarluni. Inuit Ataqatigiilli taamani 84-inik qinerneqarsimavoq, maannali qinersisui 16-iniullutik.
Ittoqqortoormiuni qinersisinnaasut 80,4 procentii qinersiartorput.
Naleraq Tunumi taaguunneqarnerpaat tulliusoq
Siumup taasinerit 200-t sinnerlugit annaavai, Taamaattorli suli 38,3 procentinik taaguunneqarnerpaavoq.
Aammattaaq Naleqqap Demokraatit Inuit Ataqatigiillu angullugit, taaneqarnerpaat aappaattut 23,3 procentinik taaneqarsimalluni inissippoq.
Atassut procentimik ataatsimik taaneqarluni kinguariangaatsiarpoq. Partiimi 2017-imi 21,8 procentinik taaguunneqarsimavoq.
Tasiilami innutaasut qinersiartortut 2017-imi 37,8 proncetinit 19 proncentinut kommunimut qinersinerit kingulliit isigissagaanni ikileriarujussuarsimapput.
Nunaqarfinni Tasiilap eqqaaniittuni taasinerit suli kisinneqarnerat naammassineqanngillat.