VIDEO Naleraq: Allaanngiivippoq ujaqqamut oqalulluni
Aningaasanut Inatsit Naalakkersuisunit aalajangiunneqareersimassasoq, Partii Naleqqap aningaasanut oqaaseqartartuata, Anthon Frederiksenip qularinngilaa.
- Takoreersinnaavarput. Isumaqatiginninniaraluarutta naalakkersuisooqatigiit isumaqatigiissutigereersimasaat qanoq ililluta allanngortissagatsigit? Soorlu 2015-imut isumaqatiginninniaraluaratta takugipput. Allaanngivippoq ujaqqamut oqalulluni. Allakkatigulluunniit akineqanngilagut, Anthon Frederiksen oqarpoq.
Taamaalilluni partii aningaasanut inatsimmut sunneeqaataajunnaarsippoq.
Aamma atuaruk Partii Naleraq aningaasaqarnermut inatsimmut isumaqatigiinniarnermi peqataasiamanngillat
Kajuminnanngitsoq
Aningaasanut Inatsit pillugu isumaqatigiinniarsimagaluarunilluunniit Partii Naleraq allannguisimassanngikkaluartoq, Anthon Frederiksen isumaqarpoq.
- Tassami tusaaneqanngitsutut misigigaanni, taava kina piumassuseqarsinnaava kajumissuseqarlunilu, isumaqatigiinninniarnermik taallugu pinnersaatitut inississagaanni? Taanna isumaqanngilaq.
Naak isumaqatigiinninniarnerni tusarneqarniarsarinngikkaluarlutik, Anthon Frederiksen taama oqarpoq.
Qinersisut
Qinersinermi kingullermi qinersisartunit 3000-it sinneqalaartunit, Partii Naleraq qinerneqarpoq.
Aningaasanut inatsimmut isumaqatigiinninniarnerni ilaarusunnginnertik pissutaalluni, tutsuiginassusertik innarlerneqassannginnersoq aamma tamanna ernumassutiginnginneraat, Anthon Frederiksen aperaarput.
Aamma atuaruk Illuatungiliuttut: Avaleraasartuut isumalluutigivallaarnagit
Taannali akivoq, isumaqatigiinniarnermut peqataannginnertik silatusaarnerusoq. Anthon Frederiksenilu tamanna pillugu ima oqarpoq.
- Qinersisartut tusaavagut. Uagut Andreas Uldumip suleqatiginissaa aallaqqaammut akuersaarparput. Kisianni suleqatiginiagaq tusaajumanngippat, aammalu piumasanik akuersisinnaanngippat, taava qanoq ilillugu suleqatigisinnaavarput? Anthon Frederiksen aperivoq.
