- PET Danmarkilu Kalaallit Nunaannut kilitsissiatut sulisoqarsimaneranik oqaaseqartoqarnera akerlilersinnaavaat.

Pele Brobergip (N) spionagertoqarnera pillugu unnerluussinerata DR-ip saqqummiussinerata kingorna Danmarkimi politiit isertortumik paasiniaasartui (PET) nunatta nalunaaqutaa malillugu unnuaq taamak oqarput.

USA-mit kilitsissiatut sulisoqaratarsimasinnaanera pillugu unnerluussineq Naleqqap siulittaasuata KNR-imit apersorneqarnermini oqaatigaa. 

Kilitsissiatut sulineq pineqartillugu USA-p sinniisoqarfiata matuneqarnissaaninngarnit Danmarkimut isiginiarneqarnerusariartut Pele Broberg oqarpoq:

- Kilitsissiatut sulineq nalinginnaasuuvoq, ulluinnarni maanna pisarpoq ingasangaatsiarlunilu, nunani allamiut qineqqusaarnerup aamma namminiilivinnissamik suliaqarnerup nalaani taama akuliutsiginerat ingasassoraara, taanna oqarpoq.

Qinersisoqarnerani kilitsissiatut sulisoqarsimaneranik oqaruit taava kina eqqarsaatigiviuk?

- Qallunaat tusagassiorfii aamma qallunaat naalakkersuisui, qallunaat politikerii aamma kikkut tamarmik namminiilivinnissamut akerliusut, Pele Broberg oqarpoq. 

PET-p kilitsissiatut sulisoqarnissaa pitsaaliorniaraa

Danmarki Kalaallit Nunaanni qinersisoqarnerani kilitsissiatut sulisoqarnerarsimaneqarnera PET-p DR-imut akerlilerpaa.

PET-p Kalaallit Nunaat, Danmark Savalimmiullu kilitsissianut illersuinissaq suliassarigaat, Isertortumik paasiniaasartut (PET) oqarput.

- […] massakkut Kalaallit Nunaat kilitsissiatut sulisunit sioorasaarineq sukannernerusoq aamma naalagaaffiit allaninngaanniit sunniiniarnerinit siooraneq.

- PET kalaallillu naalakkersuisui kilitsissiatut sulisunit sioorasaarinerit pillugit aamma kilitsissiatut sulisoqarsinnaaneranut maanna sioorasoqarnera qanimut oqaloqatigiissutigaat kiisalu kilitsissiatut suliniartoqassagaluarpat, Kalaallit Nunaat ajunnginerpaamik illersorneqarnissaanut ingerlaavartunik isumannaallisaarnermut pisariaqartinneqartunik pilersitsisoqartoq, PET DR-imut oqarpoq.