Naleqqap naatsorsuutai suli naammassinngillat
- Allaffimmiorput suliunnaarnikuugami, taava tassani aningaasarsianut allagartat allallu qarasaasiamiittut pissarsiarinaveerigut. Kisianni tassa pissarsiarigutsigit naammassissapput, Hans Enoksen oqarpoq.
Ukiumut naatsorsuutit inerneri naatsorsuuserisumit maannakkut suliarineqartut, paasissutissalli naggataat amigaataammata suli naammassinngitsoq, Hans Enoksenip aamma oqaatigaa.
Aamma atuaruk Siumup aningaasaqarnera assoralisimaarpoq
- Inatsisartut allattoqarfiannut saaffiginnissaagut, qarasaasiamut isertaammik nutaamik piniarluta, taava tassanngaaniit amigaatit tunniunneqassapput. Taamatut killittoqarnera soorunami aamma uanga ajuusaarutigivara, kisianni tassa eqqortumik naammassineqarnissaa qularutigineqassanngilaq, Hans Enoksen oqarpoq, ilanngullugulu oqarluni, Inatsisartut upernaanerani ataatsimiinnerat naammasseqqammertorlu, Partii Naleqqami allaffimmioq suliunnaarmat. Taassuumalu qarasaasiaanut taamanili isersinnaasimanngillat.
- Allat isertaataanut imaaliallaannaq pissarsisinnaanngilagut. Aatsaat akuersiteqqaarlugit, Hans Enoksen oqarpoq, partiilu mikinera pissutigalugu ataasiinnarmik allaffimmioqarsinnaasut aamma oqaatigalugu.
Pingaaruteqarpoq
Ukiumut naatsorsuutit inernerisa kingusissukkut tunniunneqartussaasunngoraluartut, piffissaq eqqorlugu tunniunneqartarnissai pingaaruteqartoq Hans Enoksenip nalunngilaa.
- Pingaartorujussuuvoq. Tunniussinngikkutta aamma taperneqaqqinnaviannginnatta. Kisianni massakkut naammassinninniarsarivugut. Aamma qularinngiivippara iluatsissasut, Hans Enoksen oqarpoq.
