Politikki

Siumup aningaasaqarnera assoralisimaarpoq

Partiip Siumup aningaasatigut ingerlanneqarnera annertuumik assoralisimaarpoq. Tamanna Siumup ikiumoortumik naatsorsuutaanni atuarneqarsinnaavoq, tassa partii Siumut siorna 2014 amigartooruteqagaatsiarluni ukioq aningorpaa.

Allattoq Apollo Jeremiassen, Jonas Løvschall-Wedel

juulip 08-at 2015 12:49

Kukkunersiuisut nalunaarutiminni ilaatigut ima allapput.

- Kattuffik aningaasanik atugassanik annertugaatsiartunik amigaateqarpoq soorluttaaq aningaasanik atoriaannarnik piareersimasuuteqanngitsoq. Aningaasartuutissat atoriaannaat eqqarsaatigalugit tamassuma avataaniit aningaasaliisinnaasunit ikiorserneqarnissaa pisariaqarpoq. Tamakkulu tamaasa eqqarsaatigalugit kattuffiup aningaasalersornissaa nalorninartoqartoq kattuffimmi aqutsisut nalunaarutigaat.

Aamma atuaruk Partiit ukiumoortumik nalunaarutaat takkussuutileruttorput

Tassalu ilaatigut tamanna kukkunersuiusunit isumaqatigineqartoq.

Partii Siumut siorna ukiup naanerani 231.693 koruuninik amigartooruteqarpoq. Tamanna pivoq naak partiinut tapiissutinik 5,4 millioner koruuninik Siumut siorna aningaasaliiffigineqaraluartoq.

Siumup taama annertutigisumik amigaartooruteqarneranut pissutaaqataasut ilagaat, Siumup siulittaasorisimasaata, Aleqa Hammondip siulittaasutut tunuarnera. Tassa tamanna pillugu partii immikkut ittumik ataatsimeersuartitsisariaqarnerani aningaasat 280.000 koruuninik immikkut atortariaqarsimammata.

Siumup pigisai nalillit eqqarsaatigalugit, tamanna minuseqarpoq tassa 746.754 koruuninik amigartooruteqaramik, taakkunungga ilaalluni akileraartarnermut akiitsut 185.000 koruunit.

Nutaarsiassami kukkunermik nassaarsimaguit uunga allaffigineqarsinnaavugut.