Nakorsat Ungarn-imiut aaqqiissutaasinnaapput

Nunatsinni nakorsassaaleqineq ikiorserniarlugu, nakorsanik paarlattaaginnarallartunik akisoqisunik piffissami sivikitsukkuutaartuni atorfinitsitsisoqartarpoq.

Danmarkimi illoqarfeeqqat ilaanni nakorsanik Ungarniumiunik atorfinitsitsivittarneq iluatsilluarsimavoq. Iliuuserlu tamanna maani Nunatsinni aaqqiissutaasinnaasoq oqaatigineqarpoq.

Jyllandip kimmut avannaani, Thy-Morsimi napparsimmavimmi pisortaasimavoq, Kurt Nielsen. Taassuma ungarnimiut nakorsat aalajaatsullu atorfinitsittarsimavai.

- Thy-p napparsimmaviani Ungarniumiut qulit maanna sulipput, taakkulu ukiut 20-it matuma siornali ilaquttatit nassarlugit tikinnikuupput, Kurt Nielsen, Nunatsinni Peqqinnissaqarfiup Aqutsisoqarfiani ullumikkut pisortaq oqarpoq.

Maannalu sulissutigisaasa ilagaat, nakorsanik Ungarnimiunik Nunatsinni atorfeqavissussanik aaqqiissuteqarniarneq. Taamalu puilersaaruteqarneq oqitsuinnaanngitsoq Kurt Nielsenip oqaatigaa.

- Nakorsat Nunatsinni atorfinikkunik ilisimassavaat, assersuutigalugu imaaliallaannaq operamik tusarnaariarsinnaannginnamik, tassami soorlu Ilulissani, Qaqortumi Tasiilamiluunniit tusarnaariartarfissuaqanngilaq. Taamaattumik ilisimasariaqarpaat pinngortitarsuaq avatangiisillu allaanerusut misigineqarsinnaammata. Tamakkulu tamaasa oqaluttuarissavagut, Kurt Nielsen oqarpoq.

- Ungarnimi nakorsat imaannaanngitsumik atugassaqartitaapput, ilaat pingasunik suliffeqartariaqarput ulluinnarni inuunertik akissaqartinniarlugu. Maanilu sulilissagunik nakorsat maani sulisut assigalugit akissarsiaqartinneqassapput, taamaalillutik ilaqutariittut inuunertik oqinnerusumik ingerlassinnaassallugu, Kurt Nielsen oqarpoq.

Taassuma Nunatsinni Peqqinnissaqarfiup nakorsaanera, Carsten Thordal ilagalugu, sapaatip akunnerani kingullermi Ungarnimiipput tasamani nakorsat, Nunani Avannarlerni misilittagaareersut aallaavigalugit, ilisimanerulerusullugit qanoq iliornikkut Nunatsinni aamma atorneqarsinnaanersut.

- Illoqarfinni napparsimaveqartuni nakorsanik ataavartumik atorfilinnik amigaateqarnerput soqutiginngitsuusaaginnarsinnaanngilarput, taamaattumillu tamatuma aaqqinneqarnissaa nukinnik atuiffigalutigu, Carsten Thordal oqarpoq.

- Angalanerput misissuinerinnaagallarpoq. Qanoq iliuuseqarnissarput maanna eqqarsaatigeqqaarallassavarput, Nunatsinni Peqqinnissaqarfimmi nakorsaaneq, Carsten Thordal oqarpoq.

Taassuma ilanngullugu oqaatigaa, nakorsat Ungarnimiut Nunatsinni sulisinneqalissappata, taakku minnerpaamik qallunaatut oqalussinnaanissaat kissaataammat.

Atuarfik nakorsanik qallunaatut ilinniartitsinermut atorneqartartoq Ungarnimiippoq, tassanilu nakorsat qaammatini arfineq pingasuni qallunaatut ilinniartinneqartarput Nunani Avannarlerni sulilinnginnerini.