Nakorsat allagartaajagaasut nunamut allamut nooriarlutik ingerlaqqiinnartarput
Dansk Folkeparti taama isumaqarpoq.
Taamatut oqaaseqartoqarpoq, aviisip B.T.-ip ippassaq saqqummiummagu, nakorsaq qallunaaq arnaq, Norgimi arlalippassuariarluni nammagittaalliutigineqartarnermi kingornagut, nakorsatut sulisinnaanerminik arsaagaasimasoq, Sverigimut nuunnermigut nakorsatut suliinnarsinnaasimasoq.
Taamaaliorsinnaaneq unitsinneqartariaqartoq, Dansk Folkepartip peqqissutsimut oqaaseqartartua Liselott Blixt oqarpoq.
- Peqqissutsimut ministeri Berthel Haarder tamatumunnga tunngasumik Nunani Avannarlerni suleqatigisatsinnik oqaloqateqarnissaanik qinnuiginiarpara, taamaalilluta nakorsat nakorsatut sulisinnaanerminnik arsaagaasimasut, Nunani Avannarlerni suallanneqaratik nuuttaqattaarsinnaanerat unitsissinnaaniassagatsigu, Liselott Blixt oqarpoq.
Maanna pissutsit naapertorlugit nakorsaq pineqartoq Danmarkimut - imaluunniit Kalaallit Nunaannut - nuuginnarsinnaavoq nakorsatullu sulinini ingerlatiinnarlugu, Peqqinnissamut Qullersaqarfik taama ilisimatitsivoq.