Nakorsaq coronavirusip ernumassutigineqarnera pillugu: Eqqissillusi inuunersi ingerlatiinnassavarsi
Peqqinngikkuit, napparsimaguit imaluunniit nuakkuit kaffisoriarnak ilaqutariillu kateriinneranniinnak angerlarsimaannarit.
- Qanoq iliornissamut malittarisassat maliinnassavagut. Nuakkutta kaffillissanngilagut, taamaalioruttami isertugut tunillassinnaavagut. Kaffillertunut qaaqqusaalluni nuakkaanni taava angerlarsimaannartoqassaaq.
AAMMA ATUARUK Timmisartumut ilaasut tamarmik coronavirusimik tunillatsissimanngitsut
Nunatta nakorsaaneqarfianit nakorsaq, Paneeraq Noahsen oqarpoq.
Seruminstituttimit misissorneqartoq
Tunillaassortunik nappaalasoqarneranut ataatsimiititaliarsuup innersuussutai:
- innuttaasut nunami aarlerinaatilimmeereerlutik nunatsinnut uternerminniit ulluni 14-ini tulliuttuni angerlarsimaannaqqusaapput.
- innuttaasut nunami aarlerinaatilimmeereerlutik nunatsinnut utersimasut napparsimmavinnut, utoqqaat illuinut illuutinullu allanut aarlerinaateqarfiulersinnaasunut ornigutinnginnissaat innersuussutaavoq.
Aaqqissuussat inunnit 1000-init amerlanerusunik peqataaffigineqarsinnaasut unitsinneqarnissaat kinguartinneqarnissalluunniit Tunillaassortunik nappaalasoqarneranut ataatsimiititaliarsuaq tallimanngornermi inassuteqarpoq.
Taanna Tunillaassortunik nappaalasoqarneranut ataatsimiititaliarsuaq ilagalugu Nuummiit Kangerlussuarmut Danmarkimit tikittut pingasut coronavirusimik tunillatsissimanersut misissoriartorpai.
Inuit pingasut timmisartumut Københavnimit Karlussualiartumut ilaapput. Peqqinnissaqarfimmit inuit pingasut misiliutinik ataasinngornermi tigusiffigineqarput, taakkulu Danmarkimut Statens Serum Institutimut nassiunneqarlutik.
Misiliutit inerneri marlunngornermi ullaap-tungaani paasineqarput: Coronavirusimillu tunillatsissimanngitsut paasineqarpoq.
Nunat aarlerinaatilittut pineqartut makkuupput:
- Italiami nunap ilai Emilia-Romagna, Lombardiet, Piemonte, Marche, Valle d’Aosta Venetolu.
- Irani tamarmi
- Kina (Hong Kong, Macau Taiwanilu minillugit)
- Korea Kujallermi nunap immikkoortua Gyeongbuk tassanilu illoqarfissuaq Daegu
Tusarfik: Nunatta tunillaassortunik nappaalasoqarneranut ataatsimiititaliarsua, Danmarkimi peqqissutsimut aqutsisoqarfik
Ernumanissamut pissutissaqanngitsoq
Naak amerlasuut corona pillugu ernumarrakkaluartut Paneeraq Noahsenip eqqissisimasoqaqquaa.
- Inuttut isumaqarpunga ernumasariaqanngitsugut, taamaakkaluartorli inuiaqatigiinni utoqqartagut sanngiinnerusortagullu paarissavagut, Paneeraq Noahsen oqarpoq.
Danmarkimi peqqinnissamut ministerip nakorsat soraarninngoreersimasut ilinniartullu peqqinnissaqarfimmi napparsimasorpassuarnik ulikkaartuunnginnissaat pissutigalugu sulilersinneqarsinnaalersippai.
Peqqinnissamut ministerip ”peqqinnissaqarfik artukkerneqalereerusutut” nalunaarutigineqalereersinnaasoq tusagassiortunik katersortitsinermi oqaatigaa.
Coronavirus nunatsinnut angulluni peqqinnissaqarfimmut aamma taama kinguneqartitsisinnaavoq – tamannalu pissutigalugu allanut tunillaanaveersaarnissaq pisariaqartoq, nakorsaaneq, Henrik Hansen oqarpoq:
- Maani nakorsanik soraarninngornikoqarpallaanngilaq. Nakorsarpassuarnik takkuttoqassappat taama napparsimasut nunatta avataani katsorsarneqassapput. Tamanna nualluuttoqarnerata nalaani misilereernikuuarput, nakorsaaneq oqarpoq.
AAMMA ATUARUK Najattaaq Thomsen coronavirusimik tunillatsissimanani tusarami: Qullilivunga paasigakku
Nakorsaaneqarfiup innuttaasut errortorluartarnissaannik sprittimillu assamut saligummik atuisarnissaannik siunnersuuteqarfigai.
Quersorniaraanni tangajorniaraanniluunnit kakkissarminnut talimmulluunniit tangajortoqartassaaq – assannuunngitsoq. Qitserarneq, assammiineq, ulussakkut kunissineq eqitaarinerlu pinaveersaarneqassapput.
Inuppassuit aamma katersuuffianiittoqarnaveersaassaaq.
Nakorsaaneqarfiup nittartagaa uani iserfigisinnaavat www.nun.gl
- Tunillatsissimanermut pasitsaassaqartoqaruni imaluunniit tunillatsissimanermut ersiuteqartoqaruni peqqinnissaqarfik attavigineqassaaq. Kimut sianernissaq nalornissutigineqarpat Nakorsaaneqarfiup nittartagaa iserfigalugu napparsimaviup qaninnerpaap normua nassaarineqarsinnaavoq.
- Nittartakkami nun.gl-imi paasissutissaq amerlinikuupput.
- Tunillaassortunik nappaalasoqarneranut ataatsimiititaliarsuup innuttaasut marsip aappaata kingorna sumiiffinni aarlerinaateqartuniissimasut ulluni 14-ini angerlarsimaannarnissaat inassutigaa.
- Tunillatsissimanermut ersiuteqartut kisimik misissorneqarsinnaapput. Ersiutit tassaasinnaapput: Quersorneq, kissarneqarneq anersaartorniarnikkullu ajornartorsiuteqarneq.
- Tunillatsissimanermut ersiuteqaraanni napparsimmaviit utaqqisarfiinut ingiinnartoqassanngilaq.
- - Sianertoqaqqaassaaq. Napparsimasut napparsimmavimmi napparsimasunut allanut tunillaannginnissaat pissutigalugu aggiinnassanngillat. Taamaammat tunillatsissimasinnaaneq ernumassutigineqarpat takkunnissaq nalunaarutigineqaqqaassaaq, taamaalilluni takkunnissaanut allanut tunillaasinnaajunnaarnissaa pilersaarusiorneqaqqaassaaq, nakorsaaneq, Henrik Hansen oqarpoq.