Nakorsap Trump allanut navianartorsiortitsinera pillugu isornartorsioraa
USA-p præsidentiata Donald Trumpip napparsimmavimmit anilluni biiliunneqarnera akisussaassuseqanngitsuliornerusoq, USA-mi præsidentimik paarsisut Secret Servicemeersut peqqinnissaqarfimmilu sulisut oqaatigaat.
Trump coronavirusimik nappaateqarnini pillugu Washingtonip eqqaani napparsimmavimmi Walter Reed Medical Centerimi uninngasoq, napparsimmavimmit anilluni napparsimmaviup eqqaani biiliunneqarpoq, tapersersuisut napparsimmaviup silataaniittut tassani aalateriffigalugit. Præsidentip biilii aqerlunit pitarneqarsinnaanngitsut paarsisunik Secret Servicemeersunik ilaasoqarput, paarsisullu maanna sapaatit-akunnerini marlunni mattusimatinneqartussanngorlutik.
Trump napparsimmaviup eqqaani sivikitsumik biiliunneqareerluni napparsimmavimmut uterpoq, taamatullu biiliunneqarnera isornartorsiorneqarpoq.
AAMMA ATUARUK Trumpip inuit qulit sinnillit tunillatseqatigigai
Walter Reed Medical Centerimi nakorsaq James Phillips isornartorsiuisunut ilaavoq.
- Præsidentip biilii aqerlumit pitarneqarsinnaanngillat, assersuutigaluguli akoorutissat toqunartut atorlugit saassunneqaratarsinnaanissaanut illersuutilerneqarsimavoq, tamannalu pillugu matoqqalluinnarlutik. Coronavirus tassani tuniluunnerusinnaavoq, akisussaassuseqanngitsuliorneq tupinnaqaaq, James Phillips ilaatigut oqarpoq.
Trump sulisullu illersorniarlugit qanoq-iliuuseqartoqartoq illersuutinillu ilaatigut atugaqartut, præsidentip illorsuata Det Hvide Husip oqaaseqartartuata Judd Deerep oqaatigaa. Nutaarsiassaqartitsivik AFP taama allappoq.
