Nakorsamik unnukkut pisariaqartitsivit? Taava illoqarfimmut sanilerisamut sianerit
Qasigiannguani napparsimmavik nal. 16.00-mit 08.00-imut nammineq ornigulluni oqarasuaatikkulluunniit saaffigineqarsinnaanngilaq. Qasigiannguani innuttaasut nalinginnaasumik ammasarfiup kingorna ikiorneqarnissamik pisariaqartitsisut nunap immikkoortuani napparsimmavimmut Aasianniittumut sianertariaqarput.
Aaqqissuussineq 2011-mi aasakkut eqqunneqarpoq, Qasigiannguarmiullu taamani aallaqqaammut nal. 23.00-ip 08.00-illu akornanni Aasiannut sianeqquneqarlutik. Kingorna maajimi 2012-imi tamanna 16.00-mit 08.00-imut sivitsorneqarpoq, Naalakkersuisullu taamatut periuseqarnerup allanngortinneqarnissaanut pilersaaruteqanngillat.
- Aaqqissuusineq nutaaq Qasigiannguani peqqinnissaqarfiup upalungaarsimaniarneranik ajornerulersitsinngilaq. Peqqinnissaqarfimmi upalungaarsimaniarneq nakorsamit peqqissaasumilluunniit suli isumagineqarpoq, Peqqissutsimut Naalakkersuisoq Agathe Fontain oqarpoq.
Kristian Jeremiassenip Siumumeersup Qasigiannguani peqqinnissaqarfimmi upalungaarsimaniarneq ernumanartoqartillugu § 37 tunngavigalugu apeqquteqaateqartuuvoq.
- Aaqqissuussinerup piffissamik nalinginnaasumik suliffiup iluani peqqissaanermik sulialinnik sulisoqarneq pitsaanerulersissagaa naatsorsuutigineqarpoq, tamatumalu kingunerisussaavaa aningaasat atugassarititaasut atorlugit annertunerusumik peqqissaaneq, Agathe Fontain oqarpoq.
Ilanngullugu oqaatigaa aaqqissuussinerup eqqunneqarnerata kingorna Qasigiannguani Qeqertarsuarmilu innuttaasunit aaqqissuussineq pillugu maalaarutinik Nunap immikkoortuani aqutsisut tigusaqarsimanngitsut.
