Nakorsaatitorunnaarami GU-mut sioorasaarivoq

Angut 28-nik ukiulik Qeqqani Ilinniarnertuunngorniarfimmut ukioq manna februaarip qaammataani sioorasaarisimanerminut Danmarkimi katsorsartittussanngorluni Nuummi eqqartuussivimmi ullumi ullaap tungaani nalunaaqutaq qulit qaangilaaraa pineqaatissinneqarpoq.

 - Inuttut atugarisai tarnimigullu nappaatai qiviaraanni pineqaatissinneqarnera naleqquttuuvoq.

Angut 28-nik ukiulik Nuup eqqartuussiviani pineqaatissinneqareersorlu illersuisoq Ulrik Blidorf KNR-imut taama oqarpoq. 

Eqqartuussineq ullaaq manna nalunaaqutaq qulingiluanut ammarneqarpoq, unnerluutigineqartorlu nassuereermat eqqartuussisup Myrna Lyngep eqqartuussut qulip qaangilaaginnaraa nalunaarutigaa.

Columbine eqqartorpaa

Ilinniarnertuunngorniarfimmi ilinniartitsisorisimasaminut emailikkut sioorasaarisimanini angutip pineqartup nassuerutigaa.
Sioorasaarummi USA-mi Columbine High Schoolimi atuartunut 1999-imi eqqaassineq taassuma sioorasaarummini eqqartorpaa.

Politiassistenti, Britta Davidsen, eqqartuussinermi unnerluussisussaatitaasuuvoq. Eqqartuussutillu nalunaarutigineqartup taassuma illersuisutut naammagisimaarpaa.

Danmarkimi tarnimikkut nappaatilinnut napparsimavissuarmi katsorsarneqartussanngorlugu eqqartuunneqarpoq, eqqartuussissutillu aamma ilagaa katsorsarneqarnerani piumasaqaatit assigiinngitsut naamassineqassasut.

- Ilaatigut soorlu Pinerluuteqarsimasunut Isumaginnittoqarfimmit nakkutigineqarnissaa, suliffeqarnera, sumiinnera, taavalu imigassanut ikiaroornartunullu atornerluinermut katsorsarneqassasoq, kiisalu aningaasaqarneratigut aamma nakkutigineqassasoq, Britta Davidsen oqaluttuarpoq.

Peroriartornermini persuttagaasarsimasoq

Unnerluutigisaq sioorasaarisimasutut pisortanilu sulisunut narrunarsaasimasutut eqqartuunneqarpoq.

Tarnimikkut nappaatilinnut napparsimavissuup Danmarkimi Risskovimiittup nalunaarusiaa eqqartuussinermi tunngavigineqarpoq.

Nalunaarusiaq naapertorlugu angut tarnimigut napparsimarujussuarpoq, ataatassaminiillu peroriartornermini persuttagaasarsimanerminik artorsaateqarluni.

Danmarkimilu katsorsartinnikkut angutip napparsimanini anigorsinnaassagaa, illersuisoq Ulrik Blidorf isumaqarpoq:

- Taava nakorsat Pinerluttunillu Isumaginnittoqarfik naliliippata isumaqatigiillutillu, taava soorunami inuiaqatigiinnut anillatseqqinneqarumaarpoq, nalinginnaasumik inuiaqatigiinni peqataaqqilerluni.