Nakorsaatinik nakkutilliisoqarfik: Tallimaleereersut Covid-19-imut akiuussusersorneqartariaqarput

Europami meeqqat qanittukkut immaqa akiuussutissamik Pfizer/BioNTechimeersumik akiuussutissinneqartalissapput.
Covid-19-imummi akiuussutissaq Pfizer/BioNTechimeersoq meeqqanut tallimaniit aqqanilinnut ukiulinnut akiuussutissatut akuerineqarnissaa, Europamimi Nakorsaatinik Nakkutilliisoqarfiup kajumissaarutigaa.

Peqqinnissamut aqutsisoqarfimmi pisortaq, Søren Brostrøm, siornatigut oqaatiginikuuaa, meeqqat aqqaneq-marluk inorlugit ukiullit akiuussutissinneqartalissanersut oqallisigineqartariqartoq.

- Uppernarsaatit, akuersissutit kiisalu coronap tuniluunnerata qanoq isikkoqalernera apeqqutaapput, Søren Brostrøm aggustimi oqarpoq.

Europami Nakorsaatinik Nakkutilliisoqarfimmi immikkut ilisimasallit akiuussutissap qanoq iluaqutaatiginera kiisalu meeqqanut tallimaniit aqqanilinnut ukiulinnut qanoq sunniuteqarsinnaanera qaammatini marlunni misissoreerlugit, maanna atuutsilernissaa kajumissaarutigaat.

Akiuussutissaq Pfizer/BioNTechimeersoq ullumi meeqqanut aqqaneq-marlunnik ukiulinnut utoqqaanernullu akuerisaanikooreerpoq. Israelimili USAmilu meeqqat tallimanik ukiulinniit akiuussutissamik kapitittalereernikuupput.
Nakorsaasiorfiit akiuussutissamik sanasartut oqarput, akiuussutissaq taanna nakkutigilluakkamik meeqqanut tallimaniit aqqanillit tikillugit ukiulinnut misilittareerlugu, 90,7 procentimik iluaqutaatigisartoq paasineqartoq.

Danmarkimi peqqinnissamut aqutsisoqarfimmiit taanna pillugu suli oqaaseqartoqanngilaq, kajumissaarut EU-kommissionimi inaarutaasumik akuerineqaqqaartussaammat.

EU-Kommissionilli akuersissuteqarnissaa naammassiinnagassatut isigineqarpoq.