Nakorsaaneqarfiliortoqassappat nakorsat amerlanerusariaqartut

-Taamaalisoqassappat nakorsat amerlanerit atorfinitsinneqartariaqarput, Qaqortumi nakorsaaneq Lars Klenow oqarpoq.

Kalaallit Nunaat Nakorsaaneqarfinnut tallimanut agguarneqassanersoq upernaaru Inatsisartut akuerippassuk, nakorsatut atorfeqareersunut suliat pilerinarunnaassapput, taama eqqoriaavoq Qaqortumi nakorsaaneq Lars Klenow.

Suliakkiissutigineqartussat eqiteruttussaammata nakosartut atorfiit qinnutiginissaat tunuarsimaarfigineqalissasoq, Lars Klenow oqarpoq.

Taamaattoq qullersanit tapersersorneqarnissaq ajunnginnerpaassannerarpaa.

Ullumikkutut nakorsatut atorfillit ikippallaarput amerlineqartariaqarlutillu taamatullu pisoqanngippat sulereersut suli amerlanerujussuarnik pisassaqalersinneqassapput, Lars Klenow nassuiaavoq.

Nakorsat taarseraattut amerlanerit napparsimasunut attuumassuteqartalissapput.

Illoqarfiit saniliusut nakorsiartarfiinut nakorsat suliartortinneqartalissapput saniatigullu pigaartuutinneqartarsinnaassallutik.

Nakorsaaneqarfiit 2011 –mi pilersinneqassappata, kujataani nakorsat qassit pisariaqartinneqalissanersut apeqqutigigakku, Lars Klenow akivoq, apeqqutaasoq pitsaassuseq qanoq ittoq anguniarneqassanersoq. Napparsimmavinni pilattaanermut nakorsaatilerinermullu ilisimasallit qulakkeerlugit atorfeqatinniarneqanngippata, sulisussanik allanik amerlisaasoqartariaqarpoq sulereersut pisassaqarpallaanertik pissutigalugu qasutilissanngikkaanni, Lars Klenow oqarpoq.

Qeqqata Nakorsaaneqarfia Sisimiuni januarip aallaqqaataaniit misiligummik aallartittoq, Peqqissutsimut Naalakkersuisoq Agathe Fontain ilisimatitsivoq.

Piffissap ingerlanerani suut kukkussutaanersut paaserusukkamikkit taama misileraalerlutik aamma oqarpoq.

Qeqqani, Diskobugtimi, Avannaani, Sermersuumi kujataanilu 2011–mi nakorsaaneqarfeqalissanersoq Inatsisartut ukiaanerani oqaluuserissavaat.