Nakorsaaneq: Taamaammat maannakkut napparsimavutit
Immaqa illit nammineq, qitornat suleqativilluunniit ilaat pisarnermit sakkortunerusumik nualluppoq.
Immaqa aamma tusarpat, qaammatini arlalinni spritilersuutit atorluarlutigit virusinik bakterianilllu tunillatsinnaveersaarnitta kinguneranik timitsinni akiuussutissagut sanngiillimmata napparsimalersugut.
Tamannali piviusunik tunngavissaqanngilaq, nakorsaanerullu Henrik L. Hansenip imatut oqaatigaa:
- Tamanna ilisimatuussutsikkut ilisimasanik tunngavissaqanngilaq.
Taavami napparsimalernitsinnut suna pissutaava?
Allat pisuussutigaat
Henrik L. Hansenip oqaasii naapertorlugit, nunarsuatsinnut ammaanneqaqqinnerput napparsimaqqajaanerunitsinnut pissutaavoq. Nunarsuatsinni tamani mattussuunneqarmat maanilu assigiinngigtsunik killilersuigatta nappaatit tunillannaveertinnikuuagut, maannali tunillaassorsinnaanngorlutik.
- Nappaatit nuallunnertut, influenzatut assigisaattullu ittut inuiaqatigiit kalaallit akornanni tuniluuttut nunatta avataaneersuupput. Maanna immitsinnut atassuteqaqatigiinneruleratta nappaatit tuniluunnerulerput, Henrik L. Hansen oqarpoq.
Kalaallit Nunaat avinngarusimaqimmat Danmarkimiit Islandimiillu timmisartumik angallanneq nappaatit maani tuniluunnerannut pissutaaneruvoq. Nappaatit timmisartumik angalasunut ”ilaallutik” angalaqataasarput, nunallu sinneranut tuniluutilertarlutik.
Timitsinni akiuussutissagut ajunngillat
Nualluutip tuniluunnerata nalaani sivisuumik mattussaasarnitsigut timitsinni akiuussutissanik sanngiillisimaneraanerit Henrik L. Hansenip upperinngilai.
- Maanna napparsimalertarnitsinnut timitsinni akiuussutissatta sanngiillisimanerat pissutaanngilaq. Avataaniit tunillaassuisoqarnerummat kiisalu siornatigutuut tunillatsinnginnissarput sissuinnginnatsigu napparsimalertarpugut.
Taamaammat coronap tuniluutilinnginerani pissutsit nalinginnaasut uterfigeqqilerpagut?
- Aap, taamatut oqartariaqarpugut.
Napparsimanaveersaarusukkuit Peqqinnissaqarfimmi qullersat assigiinngitsunik siunnersuutissaqarput.
Timersorneq naammattumillu sinittarneq timitsinni akiuussutissanut iluaqutaasarput. Tamatuma saniatigut assaat eqqilutitsuunissaat pingaaruteqarpoq, assatsinnimmi attukkagut aqqutigalugit nappaatit tunillaateqqajaanerusarmata.