Nakorsaaneq: Sakialluut nunatsinneersuunavianngilaq
Inuit arfineq-pingasut tb-qarput, allat 21-t tb-p bakteriaanik bakteriaqarput, taakkulu pinaveersaartinniarlugit nakorsarneqarput. Amerlanerit kalaaliupput.
Nakorsaaneqarfimmiit ilimagineqanngilaq, tuberkulosi Nunatsinniit Jyllandip kitaanut anngussimassasoq.
- Tamanna ilimananngilluinnarpoq. Danmarkimimi takusarparput, inuttut ajornartorsiuteqartut, ajuvissuni najugaqartut, imminnut tunillaassuunnerusartut, soorlu kalaallit Københavnimi, Aarhusimilu najugallit, maannalu aamma Esbjergimi tunillaassuuttoqartoq paasivarput. Kisianni sakialluut Kalaallit Nunaanniit nassarsimasariaqanngilaq, Nunatsinni nakorsaaneq, Flemming Kleist Stenz, oqarpoq.
Danmarkimi peqqinnissaqarfimmit maanna misissorneqarpoq, sakialluuteqartut kikkut attaveqarfigisimaneraat, attaveqarfigineqarsimasullu peqqissaasunit sapinngisamik nakorsaatinik isumaginiarneqartut, Esbjergimi peqqinnissamik nakkutilliisoq ilisimatitsivoq.
