Nakorsaaneq ammaasoqannginnerani: Maannakkut piareersimalluarneruvugut
Naalakkersuisut ammaasoqaqqinnissaanut qanoq periuseqartoqarnissaanut sapaatip-akunnerata siuliani saqqummersitsipput. Aallaqqaasiutigalugu inuit amerlanerpaamik 600-it sapaatip-akunneranut isersinnaatinneqarnissaat pilersaarutigineqarpoq.
Nakorsaanerup, Henrik Hansenip oqarnera naapertorlugu nunatsinni coronaviruseqartoqaleqqaarneranit peqqinnissaqarfimmi pisoqangaatsiarnikuuvoq.
- Qaammatit marluk matuma siornanit piareersimanerungaatsiarpugut. Tamanna tunillaassuuttoqarneranit paasiniaanissamut peqqinnissaqarfimmilu katsorsaanissamut atatillugu.
- Sattalluta ingerlanitsinni ilisimanngisagut amerlangaatsiaraluarput. Taamaammat sanilliunneqarsinnaanngitsumik piareersimaneruvugut, Henrik Hansen KNR-imut oqarpoq.
Tunillatsittoqaqqinnissaanut aarlerinartoqarnerusoq
Nunatsinnik aammaaqqinneq aningaasaqarnerup ilaanik aallartitseeqqissaaq, pingaartumik takornariaqarneq matoqqatitsinermi eqqugaanerungaatsiarpoq.
Aningaasalli pisariaqartinneqartut isertinneqarnerisa saniatigut angalasut coronavirusimik aamma piaarinaatsoortumik eqqussisinnaapput.
AAMMA ATUARUK Namminersorlutik Oqartussat Air Greenlandilu bilitsinut akikitsunut akiliutinik utertitsisinnaaneq oqaluuserisimagaat
Angalasut aallannginnerminni – angalareernerminnilu nunatsinnukaqqissimasut misissorneqaqqaartarnissaat piumasaqaataassaaq. Taamaalilluni tuniluuttoqaleratarsinnaaneranut tamanna annikillisaataangaatsiassasoq nakorsaaneq oqarpoq.
- Isaasut amerlanerutillugit aarlerinartoqarnerussaaq. Tunillatsissinnermit ullut 14-it qaangiunnerani aatsaat napparsimaneq malunniussinnaalertartoq nalunngilarput, taakkulu paasisinnaanngivippagut. Aamma misissorneqaraluarunilluunniit, Henrik Hansen oqarpoq.
Danmarkimi tuniluuttoqarnerata qanoq innera ammaaqqinnissamut apeqqutaavoq, tamannalu maanna ajunngilluinnartumik ingerlavoq. Statens Serum Institutimit kisitsisit kingulliit naapertorlugit napparsimmavimmut unitsinneqartut ikiliartuinnartut tuniluuttoqarneralu nakkutigilluarneqartoq takutinneqarpoq.
Tamanna nunatsinni peqqinnissaqarfimmit ilaatigut nuannaarutigineqarpoq, danskilli inuiaqatigiivini ammaassuileruttortoqarpoq.
Nakorsaanerullu tamanna tuniluuttoqarneranut pissutsinut piffissap sivikitsup ingerlanerani allannguisinnaanerarpaa.
Ammaanissaq pisariaqartoq
Naalli nunatta killeqarfiinik ammaasoqarnerani nunatsinni nutaanik tunillatsissimasoqalernissaanut aarlerinarnerulersitsisoqassagaluartoq politikerit ammaaqqinnissamut taama iliuuseqartariaqariaqarlutik misigisimapput.
Suliffeqarfiit qassiiusut killeqarfiit matoqqanerat pissutigalugu aningaasanik annaasaqarput, suliffeqarfiillu annerit soorlu Air Greenland coronap ajornartorsiortitsinerata kingunerisaanik soraarsitsisariaqarluni nalunaaruteqareerpoq.
AAMMA ATUARUK Coronap ajornartorsiortitsinerani: Aatsitassarsiortunut aningaasaqarnikkut piumasaqaatit naalakkersuiusut qasukkaraat
Politikerit qanoq aarlerinartigisumik iliornissamut isumaliuteqarnissaat apeqqutaaginnarpoq. Nakorsaanerulli ammaasoqaqqinnissaanut suliaqartoqarnera paasisinnaavaa.
- Nunatta matoqqaannarnissaanut annertuumik kinguneqarnissaa soorunami takusinnaavarput, taamaammat arlaannik iliuuseqartoqassaaq. Peqqinnissamut tunngatillugu maannakkorpiaq aarlerinartoqanngilaq, taamaattoqaannarsinnaanngilarli, Henrik L. Hansen oqarpoq.