Nakorsaaneq akiuussuserneqarsimanermut uppernarsaat pillugu: Suli angunngilarput

Danskit covid-19-imut akiuussuserneqarsimanerminnut uppernarsaateqalingalerput. DR taama allaaserisaqarpoq.

Peqqissutsimut utoqqarnullu ministereqarfiup akiuussuserneqarsimanermut uppersarnaat ineriartortinneqartoq, DR-imut paasissutissiissutigaa. Taanna 2021-p aallartinnerani piariissaaq.

Akiuussuserneqarsimanermut uppernarsaat akiuussutissamik kapitissimasunut uppernarsaataassaaq. Taanna assersuutigalugu angalanissamut pisariaqalersinnaavoq.

Maanili nunatsinni nakorsaaneq, Henrik L. Hansen utaqqimaarpoq.

AAMMA ATUARUK Coronamut akiuussuserneqarsimanermut uppernarsaatit atuutilingajalersut

- Maanna suli pisariaqalinngilaq. Nunani allani qanoq ineriartortoqarnera malinnaavigissavarput, saqqumilaalerpallu nunani allani aaqqissuussinernut assingusunik pilersitsissagunarluta, nakorsaaneq oqarpoq.

Danmarkimit nunatsinnut angalanissamut akiuussuserneqarsimanermut uppernarsaateqartoqassava?

- Qanoq ineriartortoqarnissaata siulittornissaa ajornakusoorpoq. Kisianni angalanissamut akiuussuserneqarsimanermut uppernarsaateqartoqartariaqalersinnaavoq. Piffissamili matumani taamaaliortoqartariaqanngilaq.

- Avataaniit piumasaqaateqartoqarpat iliuuseqarfigissavarput. Tassa danskit nunalluunniit allat tungaanniit angalanissamut pappiaqqamik taamaattumik peqarnissaq piumasarineqassapppat, angalasoqarnissaanullu ammaasoqaqqissappat taama angalanissamut pisariaqartitsisut uppernarsaateqarsinnaanissaat qulakkiissavarput, Henrik L. Hansen oqarpoq.

Danskit suliffissuanni nuannattut

Danmarkimi peqqissutsimut utoqqarnullu ministereqarfik naapertorlugu nunamut isernissamut akiuussuserneqarsimanermut uppernarsaateqartoqarnissaa nunani allani piumasaqaataalersinnaanera pissutigalugu uppernarsaammik suliarinnittoqarpoq.

Dansk Industrimi angalassinermut pisortap, Michael Svanep akiuussuserneqarsimanermut uppernarsaateqartoqalernissaa nuannaarutigaa.

Uppernarsaat taanna angallassinermik suliaqartunut, Danmarkimi marsip qaammataanili matusinermit angalannermullu killilersuinermit eqqugaangaatsiarsimasut immaqa iluaqutaasinnaassaaq.

- Nunanut allanut isernissamut akiuussutissamik kapitissimanermik tunillanneqarsimannginnermulluunniit uppernarsaateqarnissaq piumasaqaatavoq. Akiuussutissamillu kapitissimanermut uppernarsaatip tamanna uppernarsarsinnaavaa, Michael Svane DR-imut oqarpoq.

Akiuussutissamik kapitissimanermut uppernarsaateqalernissaq atuutilersinneqassanersoq sivisuumik oqallisaareerpoq. Inuiaqatigiinni akiuussutissamik kapitissimasunut taamatullu covid-19-imik tunillaassuisinnaasutut naatsorsuutigineqarunnaarsimasunut ammaasseqqissinnaalernissaq siunertaavoq.